މިދިޔަ ހަފުތާގެ ތެރޭގައި (އޮގަސްޓް 16 އިން 22 އަށް) މަކަރާއި ހީލަތުން ފައިސާ ހޯދުމުގެ 39 މައްސަލައެއް ފުލުހުންނަށް ހުށަހަޅާފައިވާއިރު، އެ މައްސަލަތަކުގައި ގެއްލުނު ފައިސާގެ 48.66 އިންސައްތަ (222,755.20 ރުފިޔާ) އަނބުރާ ހޯދާފައިވާ ކަމަށް ފުލުހުން ބުނެފިއެވެ. މިދިޔަ ހަފުތާގައި ދުވާލަކު އެވަރޭޖުކޮށް 5 މައްސަލަ ރިޕޯޓުކޮށްފައިވާއިރު، މަކަރާއި ހީލަތުން ޖުމްލަ 457,776.96 ރުފިޔާ ވަނީ އާންމުންގެ އަތުން އަތުލާފައެވެ.
އެންމެ ގިނައިން ރިޕޯޓުކޮށްފައިވަނީ އޮންލައިންކޮށް ވިޔަފާރިކުރުމުގެ ނަމުގައި ހިންގި "އީ-ކޮމާސް" 13 ސްކޭމާއި، ބޭރު ފައިސާ މާރުކޮށްދޭނެ ކަމަށް ބުނެ ހިންގި 10 ސްކޭމެކެވެ. މީގެއިތުރުން ދަންނަ މީހުންގެ ނަމުގައި ގުޅައިގެން ހިންގި 5 މައްސަލައަކާއި، ބުކިންގ ރިފަންޑާ ގުޅޭ 4 މައްސަލައެއްގެ އިތުރުން އިންވެސްޓްމަންޓް 2 ސްކޭމް ހިމެނެއެވެ. ފުލުހުން ފާހަގަކުރި ގޮތުގައި، ރާއްޖޭގައި ހިންގާ ސްކޭމްތަކުގެ 99 އިންސައްތައަކީ ސޯޝަލް މީޑިއާ މެދުވެރިކޮށް ހިންގާ މައްސަލަތައް ކަމަށްވާއިރު، އޭގެ ތެރެއިން 95 އިންސައްތަ ހިއްސާކުރަނީ ފޭސްބުކް މާކެޓްޕްލޭސް މެދުވެރިކޮށް ހިންގާ ސްކޭމްތަކެވެ.
މިފަދަ ސްކޭމްތަކުން ރައްކާތެރިވުމަށްޓަކައި، އޮންލައިންކޮށް ވިޔަފާރިކުރުމުގައި މުދާ ލިބުމުން ފައިސާ ދައްކާ "ކޭޝް އޮން ޑެލިވަރީ" އުސޫލަށް އިސްކަންދިނުމަށާއި، ބޭރު ފައިސާ މާރުކުރުމުގައި ސޯޝަލް މީޑިއާ ގްރޫޕުތަކުގެ ބަދަލުގައި ހުއްދަ އޮންނަ މަނީ އެކްސްޗޭންޖުތަކާއި ބޭންކުތައް ބޭނުންކުރުމަށް ފުލުހުން ވަނީ އިލްތިމާސްކުރައްވާފައެވެ. އަދި ދަންނަ މީހެއްގެ ނަމުގައި ފައިސާއަށް އެދި މެސެޖުކުރި ކަމުގައިވިޔަސް، ފައިސާ ފޮނުވުމުގެ ކުރިން ސީދާ އެ މީހަކަށް ގުޅައި ސައްހަކަން ކަށަވަރުކުރުމަށްވެސް އިރުޝާދު ދެއްވާފައިވެއެވެ.
