ސަރުކާރުގެ ބޯހިޔާވަހިކަމުގެ މަޝްރޫޢަށް ހުށަހެޅި 58,585 ފޯމުގެ ވެރިފިކޭޝަން މަރުޙަލާގެ ތެރެއިން، މަޢުލޫމާތު ފުށުއަރާ ފަރާތްތަކަށް "ބޯހިޔާވަހިކަން" ޕޯޓަލް މެދުވެރިކޮށް އެކަން އަންގައި، ޖަވާބުދާރީވުމަށް 7 ދުވަހުގެ މުއްދަތެއް ދޭން ވަނީ ފަށާފައެވެ.
އެޕްލިކަންޓުންގެ ބިންވެރިކަމާއި، ގޯތިގެދޮރާއި، ތަޢުލީމާއި، ވަޒީފާ އަދި ދަފުތަރާ ގުޅޭ މަޢުލޫމާތުތައް ކައުންސިލްތަކާއި ކަމާބެހޭ އިދާރާތަކުގެ ރެކޯޑުތަކާ އަޅާބަލައި ކަށަވަރުކުރަމުންދަނީ އޮޓަމޭޓެޑް ސިސްޓަމަކުންނެވެ.
ކައުންސިލްތަކުގައި އަދާހަމަނުވާ ރެކޯޑު ހުރުމާއި، ޝަރުޢީ މަރުޙަލާގައިވާ މައްސަލަތަކުގެ އިތުރުން ތަރިކަ މުދަލުގެ މައްސަލަތައް ނުނިމި ހުރުމުގެ ސަބަބުން ސިސްޓަމުން ފުށުއެރުންތައް ފްލެގްކުރެއެވެ. މިފަދައިން ފުށުއެރުމެއް އުޅޭކަން އަންގައިފިނަމަ، އެކަމަށް ޖަވާބުދާރީވެ ސާބިތުކޮށްދިނުމަށް 7 ދުވަހުގެ މުއްދަތެއް ލިބޭނެއެވެ. އެންމެހާ ޖަވާބުދާރީވުންތަކާއި ލިޔެކިޔުންތައް ހުށަހަޅަންޖެހޭނީ ހަމައެކަނި ބޯހިޔާވަހިކަން ޕޯޓަލް މެދުވެރިކޮށެވެ. މުއްދަތުގެ ތެރޭގައި ހުރިހާ ލިޔެކިޔުމެއް ހޯދަން ދަތިވިނަމަވެސް، 7 ދުވަސް ހަމަވުމުގެ ކުރިން ޕޯޓަލްއިން މުޢާމަލާތް ފަށަންޖެހޭނެއެވެ.
ވެރިފިކޭޝަން މަރުޙަލާ ނިންމައި، ފްލެޓާއި ގޯތި ލިބޭ މީހުންގެ ލިސްޓު ޑިސެމްބަރު މަހުގެ ތެރޭގައި އާންމުކުރުމަށް ސަރުކާރުން ދަނީ މަސައްކަތް ކުރަމުންނެވެ. އެހެންކަމުން، އެޕްލިކަންޓުން ޤަވާއިދުން ބޯހިޔާވަހިކަން ޕޯޓަލްއަށް ލޮގިންވެ ސްޓޭޓަސް ޗެކްކުރުމަށް ސަމާލުވާންޖެހެއެވެ. އަދި އެންގުންތައް އަންނާނީ ވަކި ތަރުތީބަކުން ނޫން ކަމުން، ނޯޓިފިކޭޝަން ލިބުމާއެކު ކަނޑައެޅިފައިވާ މުއްދަތުގައި ޖަވާބުދާރީވުން މުހިންމެވެ.
