ފާއިތުވި ހަފުތާގައި ފުލުހުންނަށް ސްކޭމްގެ 53 މައްސަލައެއް (ދުވާލަކު އެވަރޭޖުކޮށް 7 މައްސަލަ) ހުށަހަޅާފައިވާއިރު، އެ މައްސަލަތަކުގައި ގެއްލުނު ފައިސާގެ %56.73 އަނބުރާ ހޯދާފައިވާ ކަމަށް ދިވެހި ފުލުހުންގެ ޚިދުމަތުން ހާމަކުރައްވައިފިއެވެ.
އެގޮތުން ގެއްލުނު 475,275.76 ރުފިޔާގެ ތެރެއިން 269,631.27 ރުފިޔާ ވަނީ ފުލުހުންގެ މަސައްކަތުން އަނބުރާ ހޯދައިފައެވެ. ހުށަހެޅުނު މައްސަލަތަކުގެ ތެރޭގައި އެންމެ ގިނައީ އީ-ކޮމާސް ސްކޭމް (22 މައްސަލަ) އާއި ބޭރު ފައިސާ މާރުކުރުމުގެ ސްކޭމް (12 މައްސަލަ) އެވެ. މީގެއިތުރުން ބުކިން ކެންސަލޭޝަން ރިފަންޑް ސްކޭމްގެ 7 މައްސަލައާއި އެހެން މީހަކަށް ހެދިގެން އޮޅުވާލުމުގެ 3 މައްސަލަ ހިމެނެއެވެ.
ރާއްޖޭގައި ހިންގާ ސްކޭމްތަކުގެ %99 އަކީ ސޯޝަލް މީޑިއާ މެދުވެރިކޮށް ހިންގާ ކަންކަން ކަމަށްވާއިރު، އޭގެ ތެރެއިން %95 ހިއްސާކުރަނީ ފޭސްބުކް މާކެޓްޕްލޭސްއެވެ. އަދި އޭއައި ބޭނުންކޮށްގެން ޑީޕްފޭކް ކޮންޓެންޓު އުފައްދައިގެން ސްކޭމް ހިންގުން އިތުރުވަމުންދާކަން އެންޓި ސްކޭމް ސެންޓަރުން ވަނީ ފާހަގަކޮށްފައެވެ.
އެހެންކަމުން އޮންލައިންކޮށް ވިޔަފާރިކުރުމުގައި "ކޭޝް އޮން ޑެލިވަރީ" އުސޫލަށް އިސްކަންދިނުމަށާއި، ބޭރު ފައިސާ މާރުކުރުމުގައި ރަސްމީ ބޭންކުތައް ބޭނުންކުރުމަށާއި، އޯޓީޕީ ފަދަ ސިއްރު މައުލޫމާތު ހިއްސާނުކުރުމަށް ފުލުހުން އިލްތިމާސްކުރެއެވެ. އަދި ސްކޭމެއްގެ ޝިކާރައަކަށް ވެއްޖެނަމަ ލަސްނުކޮށް 125 އަށް ގުޅައި ރިޕޯޓުކުރުމަށް ފުލުހުން ވަނީ އެދިވަޑައިގެންފައެވެ.
