ރަސްމާލެ މަޝްރޫޢުގެ ދަށުން ޔޫއޭއީގެ އީގަލް ހިލްސް ކުންފުންޏާއެކު ދިވެހި ސަރުކާރުން ވެފައިވާ ވިޔަފާރި އެއްބަސްވުމަކީ ޤާނޫނުއަސާސީއާ ޚިލާފު އެއްބަސްވުމެއް ކަމަށް ކަނޑައަޅައި، އެ އެއްބަސްވުން ބާތިލުކުރުމަށް އެދި ދިވެހިރާއްޖޭގެ ސުޕްރީމް ކޯޓަށް ދުސްތޫރީ މައްސަލައެއް ހުށަހަޅައިފިއެވެ.
ގާނޫނީ ވަކީލު އަލީ ހުސައިން އެކްސް މެދުވެރިކޮށް އާންމުކުރެއްވި ބަޔާނެއްގައި ހާމަކުރެއްވި މި މައްސަލައަކީ، މިނިސްޓްރީ އޮފް އިންފްރާސްޓްރަކްޗާ، ހައުސިންގ އެންޑް އާބަން ޑިވެލޮޕްމަންޓާއި އީގަލް ހިލްސްއާ ދެމެދު ސެޕްޓެމްބަރު 21 ގައި ވެފައިވާ އެއްބަސްވުމަކާ ގުޅިގެން ހުށަހެޅި މައްސަލައެކެވެ.
މި މައްސަލައިގައި ފާހަގަކޮށްފައިވާ ގޮތުގައި، ރަސްމާލެއިން ހިއްކާ 500 ހެކްޓަރަށްވުރެ ބޮޑު ބިން، އެއްވެސް އެކުއިޒިޝަން ކޮސްޓެއް އަދި ކުއްޔެއް ނެގުމަކާ ނުލައި 99 އަހަރަށް އެ ކުންފުންޏަށް ދީ، ތިންވަނަ ފަރާތްތަކަށް ކުއްޔަށް ދިނުމުގެ ހައްގު (ރޯލިންގ ލީސް) ދީފައިވަނީ ޤާނޫނުއަސާސީގެ 250 ވަނަ މާއްދާއާއި 251 ވަނަ މާއްދާއާ ސީދާ ޚިލާފަށެވެ. އެގޮތުން، ބޭރުގެ ފަރާތަކަށް އެއްފަހަރާ 99 އަހަރަށް ދައުލަތުގެ ބިން ދޫކުރެވޭނެ ގާނޫނީ އޮނިގަނޑެއް ނެތުމާއި، ރޯލިންގ ލީސްގެ ސަބަބުން ދާއިމީކޮށް ބޭރުގެ ފަރާތްތަކަށް ބިމުގެ މިލްކުވެރިކަން ލިބިގެންދާނެ ދޮރެއް ހުޅުވިގެންދާނެތީ، މިއީ ފެށުނީއްސުރެ ބާތިލު އެއްބަސްވުމެއް ކަމަށް ކަނޑައަޅައިދިނުމަށް ވަނީ އެދިފައެވެ.
މީގެއިތުރުން، ސުޕްރީމް ކޯޓުން މި މައްސަލައިގައި ވަކި ގޮތެއް ނިންމަންދެން، އެއްބަސްވުމަށް އަމަލުކުރުން ވަގުތީގޮތުން ފަސްކުރުމުގެ އަމުރަކަށް (އިންޓަރިމް އޯޑަރަކަށް) ވަނީ އެދިފައެވެ. މި ވަގުތީ އަމުރަށް އެދިފައިވަނީ ތިންވަނަ ފަރާތްތަކުގެ ހައްގުތަކެއް އުފެދި، އޭގެ ސަބަބުން ދައުލަތަށް އިއާދަނުކުރެވޭ ފަދަ ބޮޑެތި މާލީ އަދި ގާނޫނީ ބުރަތަކެއް އުފުލަން ޖެހިދާނެތީ އެކަން ހުއްޓުވުމުގެ މަގުސަދުގައެވެ.
