މާލެ ސަރަހައްދުގައި ދުންފަތުގެ އިސްތިއުމާލުކުރުން ކޮންޓްރޯލްކޮށް، އާންމު ތަންތަނުގައި ދުންފަތުގެ އިސްތިއުމާލުކުރާ މިންވަރު މަދުކުރުމުގެ ގޮތުން ޚާއްސަ ކިއޮސްކްތަކެއް ބެހެއްޓުމާ ގުޅޭގޮތުން މާލެ ސިޓީ ކައުންސިލާއި ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މަޝްވަރާކޮށްފިއެވެ. މި މަޝްވަރާ ބައްދަލުވުމުގައި ޑެޕިއުޓީ މޭޔަރު މީކާއީލް މުޙައްމަދު ރިޔާޒާއި ކައުންސިލަރުންގެ އިތުރުން އެޗްޕީއޭގެ ބައެއް ބޭފުޅުން ބައިވެރިވެވަޑައިގަތެވެ.
ސިޓީ ކައުންސިލުން ހާމަކުރި ގޮތުގައި، ދުންފަތުގެ އިސްތިއުމާލުކުރާ މީހުންނަށް ވަކި ސަރަހައްދުތަކެއްގައި ކިއޮސްކްތައް ބެހެއްޓުމުގެ މައިގަނޑު ބޭނުމަކީ އާންމު ތަންތަނުގައި ދުންފަތުގެ ދުމުން ސަލާމަތްވެފައިވާ، ސާފު އަދި ސިއްހީގޮތުން އެކަށީގެންވާ މާހައުލެއް މާލޭގައި ގާއިމުކުރުމެވެ. އާންމު ތަންތަނުގައި، ޚާއްސަކޮށް ކުޑަކުދިންނާއެކު އާއިލާތައް ހިތްފަސޭހަކޮށްލަންދާ ޕާކުތަކުގައި ދުންފަތުގެ އިސްތިއުމާލުކުރުން ހުއްޓުވުމަށް ކަމާބެހޭ އިދާރާތަކާއެކު މަސައްކަތްކުރަން ސިޓީ ކައުންސިލުން ނިންމާފައިވަނީ މިދިޔަ އޮގަސްޓު މަހުގެ 12 ވަނަ ދުވަހުއެވެ.
ރާއްޖޭގައި ދުންފަތް ކޮންޓްރޯލްކުރުމަށްޓަކައި 2007 ވަނަ އަހަރުން ފެށިގެން އުފަންވާ ކުދިންނަށް ދުންފަތުގެ ބާވަތްތައް ބޭނުންކުރުން މަނާކުރާ "ޖެނެރޭޝަނަލް ބޭން" އެއް ގެނެސް، ދުންފަތުގެ ޑިއުޓީއަށް ބަދަލުތަކެއް ގެނެސްފައިވީ ނަމަވެސް، މަނާ ސަރަހައްދުތަކުގައި ދުންފަތުގެ އިސްތިއުމާލުކުރާ މީހުންނާމެދު ފިޔަވަޅު އެޅުމުގެ މަސައްކަތް ހަރުދަނާކުރަންޖެހޭކަން އާންމުން ފާހަގަކުރެއެވެ.
