"ފްރެންޑް 4" ސަޕްލައި ދޯނި އަޑިއަށްދިޔަ ހާދިސާގައި ގެއްލިފައިވާ ފުލުހުންގެ ސާޖަންޓް ޢަލީ ނާފިޢުގެ އާއިލާއަށް ދާޚިލީ ސަލާމަތާ ބެހޭ ވަޒީރު ޢަލީ އިޙްސާންއާއި ކޮމިޝަނަރ އޮފް ޕޮލިސް އަޙްމަދު މުޙައްމަދު ބުދަ ދުވަހު ވަނީ ޒިޔާރަތްކުރައްވައިފައެވެ.
ނާފިޢުގެ އަންހެނުންނާއި ދަރިފުޅު އަދި އާއިލާގެ އެހެން މެންބަރުންނާ ބައްދަލުކުރައްވައި ކުރިއަށްގެންދިޔަ މި ބައްދަލުވުމުގައި، ފުލުހުންގެ އިސް އޮފިސަރުންވެސް ބައިވެރިވެވަޑައިގެން އާއިލާއަށް ހިތްވަރު ދެއްވިއެވެ. އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަޢުޒިޔާއާއި، އާއިލާއަށް ކެތްތެރިކަން ދެއްވުމަށް އެދި ކުރެއްވި ދުޢާ ވަނީ ހިއްސާކުރައްވައިފައެވެ.
ވަޒީރު އިޙްސާން ފާހަގަކުރެއްވި ގޮތުގައި، ދޯނި އަޑިއަށް ދިޔަ ސަރަޙައްދަކީ 1650 މީޓަރަށްވުރެ ފުން ސަރަޙައްދަކަށްވާތީ، ރާއްޖޭގައި ހުރި ވަސީލަތްތަކުން އެ ހިސާބަށް ނުދެވޭތީ ޚާރިޖީ ވުޒާރާ މެދުވެރިކޮށް ބޭރުގެ އެހީތެރިކަން ހޯދުމުގެ މަސައްކަތް ދަނީ ކުރަމުންނެވެ. ކޮމިޝަނަރ އޮފް ޕޮލިސް ވިދާޅުވީ، ނާފިޢު މަސައްކަތް ކުރެއްވީ ފުރާނައާއި މުދާ ސަލާމަތްކުރުމުގެ މަތިވެރި އަޒުމުގައި ކަމަށާއި، މީހުން ހޯދުމަށް ކުރެވެންހުރި ހުރިހާ މަސައްކަތެއް ކުރައްވާނެ ކަމަށެވެ. އަދި މި ހާދިސާ ތަޙުޤީޤުކުރުމަށް މާލެއިން ޚާއްޞަ ޓީމެއް ފޮނުވާފައިވާ ކަމަށް ސީޕީ ވިދާޅުވިއެވެ.
މި ހާދިސާ ހިނގާފައިވަނީ މި މަހުގެ 5 ވަނަ ދުވަހުގެ ރޭ، ތ. މަޑިފުށިން ފުރައިގެން ހުވަދު އަތޮޅަށް ދަތުރުކުރަނިކޮށެވެ. ދޯނީގައި ތިބި މީހުންގެ ތެރެއިން ދޯނީގެ ކެޕްޓަން މުޙައްމަދު ޙަމްދޫންއާއި، ފުލުހުންގެ ސާޖަންޓް ޢަލީ ނާފިޢު އަދި އެމްއެންޑީއެފްގެ ސާޖަންޓް އިބްރާހީމް އަޙްމަދު ވަނީ ގެއްލިފައެވެ.
