ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) ގެ ސީއީއޯގެ މަގާމަށް މާލީ ދާއިރާގެ ތަޖުރިބާކާރެއް ކަމަށްވާ މުހައްމަދު އަހުމަދު، ރައީސުލްޖުމްހޫރިއްޔާ ޑރ. މުހައްމަދު މުއިއްޒު އައްޔަނު ކުރައްވައިފިއެވެ. މާލީ ސެކިއުރިޓީޒްއާ ބެހޭ ގާނޫނުގެ ދަށުން އޭނާ މި މަގާމަށް އައްޔަނުކުރެއްވިއިރު، މުހައްމަދު އަހުމަދަކީ މާލީ ސިނާއަތުގައި ފާހަގަކޮށްލެވޭ ފަދަ ދިގު ތާރީޚެއް އޮތް ބޭފުޅެކެވެ.
ދައުލަތުގެ އިދާރާތަކާއި އަމިއްލަ ސެކްޓަރުގައި ފައިނޭންސް، ބޭންކިން، ޕަބްލިކް އެޑްމިނިސްޓްރޭޝަން އަދި ކޯޕަރޭޓް ގަވަނަންސްގެ ދާއިރާއިން 40 އަހަރަށްވުރެ ދިގު މުއްދަތަކަށް މުހައްމަދު އަހުމަދު ވަނީ ޚިދުމަތް ކުރައްވާފައެވެ.
ކުރުނީގެ ރައީސް މުހައްމަދު ނަޝީދުގެ ވެރިކަމުގައި ފިނޭންސް މިނިސްޓްރީގެ ޑެޕިއުޓީ މިނިސްޓަރުކަމާއި ފައިނޭންޝަލް ކޮންޓްރޯލަރުގެ މަގާމުވެސް އޭނާ އަދާކުރެއްވިއެވެ. މީގެ އިތުރުން، ޕްރައިވެޓް ސެކްޓަރުގައި ބޭންކް އޮފް މޯލްޑިވްސް (ބީއެމްއެލް) އަދި ސޮލަރެލް އިންޝުއަރަންސް ފަދަ މުހިންމު ކުންފުނިތަކުގައިވެސް އޭނާ ވަނީ މަސައްކަތް ކުރައްވާފައެވެ.
މާލީ ދާއިރާގެ އަމަލީ ތަޖުރިބާގެ އިތުރުން ތައުލީމީ ގޮތުންވެސް މުހައްމަދު އަހުމަދު ވަނީ މަތީ ފާސްތަކެއް ހާސިލްކުރައްވާފައެވެ. އެގޮތުން އިނގިރޭސިވިލާތުގެ ޑަރްހަމް ޔުނިވާސިޓީ ބِޒްނަސް ސްކޫލުން މާސްޓަ އޮފް ބިޒްނަސް އެޑްމިނިސްޓްރޭޝަން ހާސިލްކުރައްވާފައިވާއިރު، އެމެރިކަން ޔުނިވާސިޓީ އޮފް ބެއިރޫތުން ވަނީ ބެޗްލާ އޮފް ބިޒްނަސް އެޑްމިނިސްޓްރޭޝަން ފުރިހަމަކުރައްވާފައެވެ.
ސީއެމްޑީއޭގެ ސީއީއޯގެ މަގާމު ހުސްވީ އެ މަގާމުގައި ކުރިން ހުންނެވި މުހައްމަދު ހުސެއިން މަނިކު މިދިޔަ އެޕްރީލް މަހުގެ ތެރޭގައި މަގާމުން ރިޓަޔާ ކުރެއްވުމާ ގުޅިގެންނެވެ.
