މާލޭގައި މީހަކަށް ބިރުދައްކައި، ގެއަކަށް ގެއްލުން ދިން މައްސަލައެއްގައި ހައްޔަރުކުރި 4 މީހަކު ބަންދުން ދޫކޮށްލައިފިއެވެ.
މި 4 މީހުން ހައްޔަރުކޮށްފައިވަނީ ނިމިދިޔަ މާރިޗު މަހުގެ 8 ވަނަ ދުވަހުގެ ރޭ 12:45 ހާއިރު ގަލޮޅުގައި ހުންނަ ގެއެއްގެ ވެރިފަރާތަށް ބިރުދައްކައި އިންޒާރުދިނުމާ ގުޅިގެންނެވެ. މި 4 މީހުންނަކީ:
- އއ. މާޅޮހުގެ ރީތިހިޔާ، މުހައްމަދު އަފްލާހް (23)،
- ނ. ވެލިދޫގެ އެލަސް، އިބްރާހިމް އަހްނަފް (21)،
- ނ. މަނަދޫގެ ހަވޭލީ، މުހައްމަދު އަޒަން (23)،
- ތ. ގުރައިދޫގެ ފަޒާ، އަލީ ނަވާފު (21) އެވެ.
އެ 4 މީހުން ހައްޔަރުކުރި އިރު ފުލުހުން އޭރު ވިދާޅުވެފައިވަނީ އެމީހުން ހައްޔަރުކޮށްފައިވަނީ ކުށުގެ ވެށިން ކަމަށެވެ. އެމީހުން ހައްޔަރުކުރުމަށްފަހު މަހެއްހާ ދުވަސް ވަންދެން ބަންދުގައި ބެހެއްޓުމަށްފަހު، ކްރިމިނަލް ކޯޓުން މިއަދު މި މީހުން ދޫކޮށްލާފައިވަނީ ވަކި ޝަރުތުތަކަކާއެކުކަމަށްވެސް މަޢުލޫމާތުލިބެއެވެ.
