ދާދިފަހުން ޖީއެސްޓީ ގާނޫނަށް ގެނެވުނު ބަދަލުތަކާ ގުޅިގެން ފަތުރުވެރިކަމުގެ ސިނާއަތުގައި ހުރި ކަންބޮޑުވުންތަކަށް ހައްލު ހޯދައިދިނުމަށްޓަކައި، ޓީޖީއެސްޓީގެ ގާނޫނަށް އަވަސް އިސްލާޙުތަކެއް ގެންނެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވާ ކަމަށް ޓޫރިޒަމް މިނިސްޓަރު މުޙައްމަދު އަމީން ވިދާޅުވެއްޖެއެވެ. މިނިސްޓަރު މިހެން ވިދާޅުވީ ގައުމީ ފަތުރުވެރިކަމުގެ ދުވަސް ފާހަގަކުރުމަށްޓަކައި ބޭއްވި ޚާއްސަ ޖަލްސާގައި ވާހަކަދައްކަވަމުންނެވެ.
މިދިޔަ އޮގަސްޓު 31 ގައި ތަސްދީގުކުރި ޖީއެސްޓީ ގާނޫނުގެ 8 ވަނަ އިސްލާހުގެ ދަށުން، ބޭރުގެ ޓްރެވަލް އެޖެންޓުންގެ އަތުން ޑެސްޓިނޭޝަން ޕްރިންސިޕަލްގެ އުސޫލުން ޓެކްސް ނަގަން ނިންމުމުން، ޔޫރަޕްގެ ޓުއާ އޮޕަރޭޓަރުންނާއި އެސޯސިއޭޝަންތަކުން ވަނީ އެކަމަށް އަމަލުކުރުން ފަސްކުރުމަށް އެދިފައެވެ. މިނިސްޓަރު އަމީން ފާހަގަކުރެއްވި ގޮތުގައި، ސިނާއަތުގެ އިސް ފަރާތްތަކުގެ ކަންބޮޑުވުންތައް މައިގަނޑު ގޮތެއްގައި ގުޅިފައިވަނީ ކަނޑައެޅިފައިވާ މުއްދަތުތަކާއެވެ. އަދި އެ މައްސަލަތަކާ ގުޅިގެން ރައީސުލްޖުމްހޫރިއްޔާއަށް ހުށަހެޅުންތައް ފޮނުވާފައިވާތީ، ގާނޫނަށް ބަދަލުތަކެއް ގެންނެވުމަށް ރައީސް ވަނީ ނިންމަވާފައެވެ.
މީގެއިތުރުން، މި ޖަލްސާގައި "ވިޒިޓް މޯލްޑިވްސް އިޔާ 2027" ގެ ލޯގޯއާއި ޝިއާރު ރަސްމީކޮށް އިފްތިތާޙްކޮށްފައިވެއެވެ. މިނިސްޓަރު ވިދާޅުވީ ކުރިއަށް އޮތް އަހަރުތަކަކީ ދުނިޔޭގެ ވާދަވެރިކަމުގެ ތެރޭގައި ރާއްޖޭގެ މަގާމު އިތުރަށް ހަރުދަނާކޮށް، ދިވެހި އިގްތިސާދަށް ބޮޑު މަންފާއެއް ލިބިގެންދާނެ ރަނުގެ ފުރުސަތެއް ކަމަށެވެ.
