ދިވެހިރާއްޖެއާއި ޗައިނާއާ ދެމެދު އޮތް ގުޅުން އައު އުސްމިންތަކަކަށް ގެންދިއުމަށް ރާއްޖެއިން އަބަދުވެސް ތައްޔާރަށް އޮތް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ޕީޕަލްސް ރިޕަބްލިކް އޮފް ޗައިނާ އުފެދުނުތާ 77 އަހަރު ފުރުމުގެ މުނާސަބަތާ ގުޅިގެން، އެ ގައުމުގެ ރައީސް ޝީ ޖިންޕިންއަށާއި ސަރުކާރާއި ރައްޔިތުންނަށް މަރުހަބާއާއި ހެޔޮއެދުންތައް ފޮނުއްވައި ދެއްވި މެސެޖުގައެވެ.
ރައީސުލްޖުމްހޫރިއްޔާގެ މެސެޖުގައި ފާހަގަކުރެއްވި ގޮތުގައި، ދެ ގައުމުގެ ދެމެދުގައި އޮތީ އިތުބާރާއި އިޙްތިރާމްގެ އިތުރުން، ތަރައްޤީއާއި ފާގަތިކަމަށް ދެކޭ އެއްގޮތް ތަސައްވުރެއްގެ މައްޗަށް ބިނާވެފައިވާ ވަރުގަދަ އަދި ދެމެހެއްޓެނިވި ގާތް އެކުވެރިކަމެކެވެ. އަދި ޗައިނާއަކީ އަބަދުވެސް ރާއްޖޭގެ ތަރައްގީގެ ދަތުރުގައި ސާބިތުކަމާއެކު ދެގޮތެއްނުވެ ދެމިއޮތް ބައިވެރިއެއްކަން ފާހަގަކުރައްވައި، ދެ ގައުމުގެ އެއްބާރުލުމުގެ ސަބަބުން ދިވެހި ރައްޔިތުންނަށް ފައިދާހުރި ގިނަގުނަ ފުރުސަތުތަކެއް ތަނަވަސްވަމުންދާ ކަމަށް އެމަނިކުފާނު ވިދާޅުވިއެވެ.
މީގެއިތުރުން، ކުރިމަގުގައި ދެ ގައުމުގެ ދެމެދުގައި ގާއިމުވެފައިވާ "ކޮމްޕްރިހެންސިވް ސްޓްރެޓީޖިކް ކޯޕަރޭޓިވް ޕާޓްނާޝިޕް" އިތުރަށް ބަދަހިކޮށް، ދޭދޭ ގުޅުން އައު އުސްމިންތަކަކަށް ގެންދިއުމަށް ރާއްޖެއިން އަބަދުވެސް ފުރިހަމައަށް މަސައްކަތްކުރާނެ ކަމުގެ ޔަގީންކަން ރައީސް މުޢިއްޒު ދެއްވިއެވެ. އަދި ދެ ގައުމުގެ ރައްޔިތުންގެ މެދުގައި އޮތް އެކުވެރިކަމުގެ ގުޅުން އިތުރަށް ބަދަހިވެ، ޗައިނާއަށް އިތުރު ފާގަތިކަމާއި ތަރައްގީއަށް އެމަނިކުފާނު ވަނީ އެދިވަޑައިގެންފައެވެ.
