ރަސްފަންނުގައި ހުރި ރުއްތަކަކުން ހުއްދަނެތި ވަގަށް ކުރުނބާ އެޅި މައްސަލައެއްގައި ސ. ހިތަދޫ، ވައިޓްހީރާ، އަބްދުއްލަތީފް (56އ) 7 ދުވަހަށް ބަންދުކުރުމަށް ކްރިމިނަލް ކޯޓުން މިއަދު އަމުރުކޮށްފިއެވެ.
ކޯޓު އަމުރުގައިވާ ގޮތުން، އޭނާގެ މައްޗަށް ވައްކަމުގެ ތުހުމަތު ކުރެވޭ މިންވަރަށް ފުލުހުން ވަނީ ހާދިސާ ރިޕޯޓު ހުށަހަޅާފައެވެ.
ކުރުނބާ އެޅުމަކީ މަނާކަމެއްކަން ނޭނގޭ ކަމަށް އޭނާ ކޯޓުގައި ބުނެފައިވީ ނަމަވެސް، އޭނާއަކީ ކުރިން ވެސް ބަންދު ރިކޯޑު އޮތް މީހެއްކަން ކޯޓު އަމުރުގައި ވަނީ ފާހަގަކޮށްފައެވެ. ގާނޫނީ އިޖުރާއަތްތަކާ އެއްގޮތަށް ހައްޔަރުކޮށްފައިވާ އަބްދުއްލަތީފްގެ ބަންދުގެ މުއްދަތު ހަމަވާނީ އަންނަ އޮކްޓޯބަރު މަހުގެ 7 ވާ ބުދަ ދުވަހަށެވެ.
