ސައިކަލުގެ މަޑިދަށުގައި ފެންފުޅިއަކަށް އަޅައިގެން ބަނގުރާ (ބަނގުއާވި) ގެންގުޅުނު މައްސަލައެއްގައި އދ. އޮމަދޫ މީހަކު 10,600 ރުފިޔާއިން ޖޫރިމަނާކުރުމަށް އދ. އޮމަދޫ މެޖިސްޓްރޭޓް ކޯޓުން ޙުކުމްކޮށްފިއެވެ.
މި މައްސަލައަކީ 2024 މާރިޗު 14 ވަނަ ދުވަހުގެ ހަވީރު ޏ. ފުވައްމުލަކު މުޙައްމަދު ޖަމާލުއްދީން ނައިބު ތުއްތު މަގުގައި ފުލުހުން ޓްރެފިކް ބަލަހައްޓަމުން ދަނިކޮށް، އެ މީހާ ދުއްވި ސައިކަލު މަޑުކުރުވައި ޗެކްކުރުމުގެ ތެރޭގައި ސައިކަލު މަޑިދަށުން ފެނުނު 500 އެމްއެލްގެ ފެންފުޅިއެއް ތަހުލީލުކުރިއިރު ބަނގުއާތްވަށް ޕޮޒިޓިވްވި މައްސަލައެކެވެ.
މި މައްސަލައިގައި ދައުލަތުން އޭނާގެ މައްޗަށް އުފުލާފައިވަނީ ގާނޫނުލްއުގޫބާތުގެ ދަށުން ހުއްދަނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ ކުށުގެ ދަޢުވާއެވެ. ޝަރީޢަތުގެ އިބްތިދާޢީ މަރުޙަލާގައާއި އަވަސްނިޔާގެ އަޑުއެހުމުގައި ދައުވާލިބޭ މީހާ ކުށަށް އިއުތިރާފްވުމާ ގުޅިގެން، ގާނޫނުގައިވާ ގޮތުގެ މަތިން އަދަބު އެއް ދަރަޖަ ލުއިކޮށް، ބަންދުގައި ހޭދަކުރި ދުވަސް އުނިކުރުމުން އޭނާގެ މައްޗަށް އައީ އެއް މަހާއި 23 ދުވަހުގެ ޖަލު އަދަބެކެވެ.
ނަމަވެސް އޭނާއަކީ ވަޒީފާއެއް އަދާކުރާ މީހަކަށްވެފައި، މިއީ ޖިނާއީ ބޮޑު ކުށަކަށް ނުވާތީ، ޖަލު އަދަބުގެ ބަދަލުގައި އެހެން އަދަބެއް ކަނޑައެޅުމުގެ މަސްލަހަތު ބޮޑުކަމަށް ފެންނާތީ، މެޖިސްޓްރޭޓް އާމިނަތު ނިޔާޝާ ވަނީ ޖަލު އަދަބު ޖޫރިމަނާގެ އަދަބަކަށް ބަދަލުކުރައްވާފައެވެ. އެގޮތުން، އަންނަ ނޮވެމްބަރު މަހުގެ ނިޔަލަށް 10,600 ރުފިޔާ މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ދައްކައި ޚަލާސްކުރުމަށް ކޯޓު ޙުކުމުގައި ވަނީ އަންގާފައެވެ.
