ޤައުމީ އެއާލައިން، މޯލްޑިވިއަންގެ އައު ސީޕްލޭން ޓާމިނަލް ރަސްމީކޮށް ހުޅުވައިފިއެވެ. މި ޓާމިނަލް ހުޅުއްވައިދެއްވީ ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީންއެވެ. މުޅި އިމާރާތް އެއްކޮށް އޭސީކޮށް، ޒަމާނީ އަދި ލަގްޒަރީ ފެންވަރަށް ތަރައްޤީކޮށްފައިވާ މި ޓާމިނަލް ފަރުމާކޮށްފައިވަނީ ރާއްޖޭގެ ގުދުރަތީ ރީތިކަމާއި ސަގާފަތް ދައްކުވައިދޭ ޚާއްޞަ ތީމަކަށެވެ.
މި ޓާމިނަލްގެ ޚާއްޞަ ޚިދުމަތްތަކުގެ ތެރޭގައި "ހުވަނދުމާ" ލައުންޖާއި، މަތީ ފަންގިފިލާގެ ޕްރައިވެޓް ލައުންޖްތަކާއި، ކުޑަކުދިން ކުޅޭ ސަރަޙައްދެއްގެ އިތުރުން ހިތްގައިމު ގާޑަން އޭރިއާއަކާއި ސީޕްލޭން ވޯޓާވޭ ފެންނަ ވިއުއިންގ ޑެކެއް ހިމެނެއެވެ. މީގެއިތުރުން ތިމާވެށި ރައްކާތެރިކުރުމަށް އިސްކަންދީ، ޕްލާސްޓިކް ފުޅި ރީސައިކަލްކުރެވޭނެ ނިޒާމަކާއި، ދަތުރުވެރިން އުފުލުމަށް އިލެކްޓްރިކް ވެހިކަލްތައް ބޭނުންކުރަން ވަނީ ފަށާފައެވެ.
