ފީފާގެ މެމްބަރު ގައުމުތަކުން އެ އިދާރާގެ އައު ވޯލްޑް ކަޕް ޕްލޭނަށް ތާއީދު ނުކޮށްފިނަމަ، އެ ގައުމުތަކަށް ލިބެން އޮތް 40 މިލިއަން އެމެރިކާ ޑޮލަރުގެ މާލީ އެހީތެރިކަން (ފަންޑިން) ގެއްލިގެންދާނެ ކަމަށް ފީފާގެ ރައީސް ޖިއާނީ އިންފަންޓީނޯ އިންޒާރު ކުރައްވައިފިއެވެ.
ފީފާގެ މެމްބަރު އެސޯސިއޭޝަންތަކަށް ފޮނުއްވި މެސެޖެއްގައި އިންފަންޓީނޯ ވިދާޅުވީ، ދުނިޔޭގެ ފުޓްބޯޅަ ކުރިއެރުވުމަށްޓަކައި ހުށަހަޅާފައިވާ އައު ބަދަލުތަކަށް އެއްބަސްވުމަކީ މެމްބަރު ގައުމުތަކަށް މާލީ ގޮތުން ބޮޑެތި ފައިދާތަކެއް ލިބިގެންދާނެ ކަމެއް ކަމަށެވެ. އަދި މި ޕްލޭން ފާސްވެއްޖެނަމަ ކޮންމެ މެމްބަރު ގައުމަކަށް ކުރިއަށް އޮތް އަހަރުތަކުގައި އިތުރު 40 މިލިއަން ޑޮލަރުގެ މާލީ އެހީތެރިކަން ފީފާއިން ފޯރުކޮށްދޭނެ ކަމަށް އޭނާ ހާމަކުރެއްވިއެވެ.
މި އައު ޕްލޭނުގެ ދަށުން މުބާރާތް ބާއްވާ މުއްދަތަށާއި މުބާރާތުގައި ބައިވެރިވާ ޓީމުތަކުގެ އަދަދަށް ބޮޑެތި ބަދަލުތަކެއް ގެނައުމަށް ވަނީ ހުށަހަޅާފައެވެ. އިންފަންޓީނޯ ވިދާޅުވި ގޮތުގައި މި ބަދަލުތަކުގެ ސަބަބުން ފީފާގެ އާމްދަނީ އިތުރުވެ، އެ ފައިސާ ދުނިޔޭގެ އެކި ކަންކޮޅުތަކުގައި ފުޓްބޯޅަ ތަރައްގީކުރުމަށް ބޭނުންކުރެވިގެންދާނެއެވެ.
"މިއީ ދުނިޔޭގެ އެކި ކަންކޮޅުތަކުގައި ފުޓްބޯޅަ ތަރައްގީކޮށް، މެމްބަރު ގައުމުތަކުގެ ފުޓްބޯޅަ އިދާރާތައް ބާރުވެރިކުރުމަށް ލިބޭ ތާރީޚީ ފުރުސަތެއް. މި ޕްލޭނަށް އެއްބާރުލުން ނުދީފިނަމަ އެ ގައުމުތަކަށް ގެއްލިގެންދާނީ ބޮޑު މާލީ އެހީތެރިކަމެއް."
ނަމަވެސް، ޔޫރަޕާއި ދެކުނު އެމެރިކާގެ ފުޓްބޯޅަ އިދާރާތަކުން ދަނީ މި ޕްލޭނާ ދެކޮޅަށް އަޑުއުފުލަމުންނެވެ. އެ ފަރާތްތަކުން ބުނާ ގޮތުގައި މާލީ އިނާމުތަކެއް ދައްކައިގެން ގައުމުތަކުގެ ތާއީދު ހޯދުމަށް ފީފާއިން ކުރާ މަސައްކަތަކީ ފުޓްބޯޅައިގެ ހަގީގީ ރޫހާ ހިލާފު ކަމެކެވެ. މީގެ އިތުރުން، މި ބަދަލުތަކުގެ ސަބަބުން ކުޅުންތެރިންގެ މެޗުތައް އިތުރުވެ، ކުޅުންތެރިންގެ ސިއްހަތަށް ނޭދެވޭ އަސަރުކުރާނެ ކަމަށްވެސް އެ ފަރާތްތަކުން ދަނީ ފާހަގަކުރަމުންނެވެ.
