ސްރީލަންކާގެ ބަންޑާރަނައިކަ އިންޓަނޭޝަނަލް އެއާޕޯޓު (ކަޓުނަޔަކަ) މެދުވެރިކޮށް އެ ގައުމަށް ގިނަ އަދަދެއްގެ މަސްތުވާތަކެތި އެތެރެކުރި ދެ ދިވެހިން ސްރީލަންކާގެ ޕޮލިސް ނާކޮޓިކް ބިއުރޯ (ޕީއެންބީ) އިން ވަނީ ހައްޔަރުކޮށްފައެވެ. ޖުލައި 22 ވަނަ ދުވަހު ހިންގި މި އޮޕަރޭޝަންގައި ހައްޔަރުކޮށްފައިވަނީ އުމުރުން 40 އަހަރާއި 28 އަހަރުގެ ދިވެހި ދެ ފިރިހެނުންނެވެ.
ސްރީލަންކާގެ ފުލުހުންނާ ހަވާލާދީ އެ ގައުމުގެ ނޫސްތަކުން ރިޕޯޓުކޮށްފައިވާ ގޮތުގައި، މި ދެ މީހުންގެ އަތުން ގާތްގަނޑަކަށް 10 މިލިއަން ސްރީލަންކާ ރުޕީސްގެ އަގުހުރި 'އައިސް' (މެތަމްފެޓަމިން) ވަނީ އަތުލައިގަނެފައެވެ. މީގެ ތެރެއިން 40 އަހަރުގެ މީހާ އެއާޕޯޓުން ހައްޔަރުކުރީ މާލެއިން ފުރައިގެން ދިޔަ ވަގުތު، އޭނާގެ ޖަނގިޔާ ތެރޭގައި ފޮރުވައިގެން 602 ގްރާމްގެ އައިސް ގެންދަނިކޮށެވެ.
އެއާޕޯޓުން ހައްޔަރުކުރި މީހާއާ ސުވާލުކުރުމުން ލިބުނު މައުލޫމާތުގެ މައްޗަށް ބިނާކޮށް، އެ މަސްތުވާތަކެތި ހަވާލުކުރަން އުޅުނު މައި ޑީލަރު ކަމަށް ތުހުމަތުކުރެވޭ 28 އަހަރުގެ ދިވެހި މީހާ ވަނީ ކޮލަމްބޯގެ ހޮޓަލަކުން ހައްޔަރުކޮށްފައެވެ. އޭނާ ހައްޔަރުކުރި ވަގުތު އޭނާގެ އަތުންވެސް 10 ގްރާމަށްވުރެ ގިނަ އައިސް ފެނިފައިވާ ކަމަށް ފުލުހުން މައުލޫމާތު ދެއެވެ.
މި މައްސަލައާ ގުޅިގެން ހައްޔަރުކުރި ދެ ދިވެހިން ނިގަމްބޯ މެޖިސްޓްރޭޓް ކޯޓަށް ހާޒިރުކުރުމުން، ތަހުގީގުގެ ބޭނުމަށް 14 ދުވަހުގެ މުއްދަތަކަށް ބަންދުގައި ބޭތިއްބުމަށް ކޯޓުން ވަނީ އަމުރުކޮށްފައެވެ. މި މައްސަލައިގެ ތަހުގީގު ސްރީލަންކާގެ ޕޮލިސް ނާކޮޓިކް ބިއުރޯއިން ދަނީ ކުރިއަށް ގެންދަމުންނެވެ.
