އައްޑޫ ސިޓީގައި ފެނަކަ ކޯޕަރޭޝަނުން ހިންގި މަޝްރޫއުތަކުގެ ތެރެއިން ކޮރަޕްޝަނަށް މަގުފަހިވާ ގޮތަށް ކޮށްފައިވާ ކަންކަން ބަލައި، އެކަމުގައި މަނީ ލޯންޑްރިންގެ ތަހުގީގެއް ހިންގަން ފުލުހުންނަށް ހުށަހެޅުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ނިންމައިފިއެވެ. މިގޮތަށް ނިންމީ ފެނަކައިގެ އައްޑޫ ބްރާންޗުތަކުގައި ހިންގި މަޝްރޫއުތަކާ ގުޅޭ ހާއްސަ ރިޕޯޓް ދިރާސާކުރުމަށް މިއަދު ބޭއްވި ކޮމިޓީ ބައްދަލުވުމުގައެވެ.
މި ބައްދަލުވުމުގައި ފުނަދޫ ދާއިރާގެ މެންބަރު މުހައްމަދު މަމްދޫހު ވަނީ ގިނަ ހުށަހެޅުންތަކެއް ހުށަހަޅުއްވާފައެވެ. އޭގެ ތެރޭގައި ފެނަކައިގެ ފައިސާއަށް ހިޔާނަތްތެރިވި އޭރުގެ ބޯޑު މެންބަރުންނާއި އެކަމުގައި ޝާމިލުވާ އެންމެންގެ މައްސަލަ ބަލަން ފުލުހުންނަށާއި އެންޓި ކޮރަޕްޝަން ކޮމިޝަނަށް ހުށަހެޅުން ހިމެނެއެވެ. މީގެ އިތުރުން ކުންފުންޏަށް ގެއްލުންވާ ގޮތަށް މަޝްރޫއުތައް ކުރިއަށް ގެންގޮސްފައިވާތީ ބޯޑު މެންބަރުންނާއި ވެރިން ޒިންމާދާރުކުރުމަށް އެންގުމަށާއި، ކުންފުނީގެ ވެރިންނާއި މުވައްޒަފުންނާ އާއިލީ ގުޅުން އޮންނަ ވިޔަފާރިތަކުން ހިދުމަތާއި މުދާ ނުހޯދޭ ގޮތަށް ޕްރޮކިއުމަންޓް ޕޮލިސީ ބަދަލުކުރަން އެންގުމަށް ވެސް އޭނާ ހުށަހެޅުއްވިއެވެ.
މަމްދޫހުގެ ހުށަހެޅުންތަކުގެ އިތުރުން ހިތަދޫ މެދު ދާއިރާގެ މެންބަރު އަހުމަދު އަޒާން ވެސް ވަނީ މުހިންމު ހުށަހެޅުންތަކެއް ހުށަހަޅުއްވާފައެވެ. އެގޮތުން ފެނަކައިގެ އައްޑޫ ބްރާންޗުތަކުގެ ވެރިންގެ އާއިލީ މީހުންގެ އެކައުންޓްތަކަށް ނުހައްގުން ފައިސާ ޖަމާވެފައިވޭތޯ ބަލައި، އެކަމުގައި މަނީ ލޯންޑްރިންގެ ތަހުގީގެއް ހިންގަން ފުލުހުންގެ ކިބައިން އެދުމަށް އޭނާ ހުށަހެޅުއްވިއެވެ. އަދި ކޮރަޕްޝަނަށް ތުހުމަތުވާ މައްސަލަތައް އަވަހަށް ބެލުމަށް އޭސީސީގެ މައްޗަށް އަމުރެއް ނެރުމަށް ޕްރޮސިކިއުޓާ ޖެނަރަލްގެ އޮފީހަށް ލަފާދޭން ވެސް އަޒާން ހުށަހެޅުއްވިއެވެ. ކޮމިޓީން މިއަދު ވަނީ މި ދެ މެންބަރުން ހުށަހެޅުއްވި ހުރިހާ ހުށަހެޅުންތަކެއް ފާސްކޮށްފައެވެ.
އޮޑިޓް ރިޕޯޓުގައި ފާހަގަކޮށްފައިވާ ގޮތުގައި އައްޑޫ ފެނަކަ ބްރާންޗުން މަޝްރޫއުތައް ހިންގާފައިވަނީ ކުންފުންޏަށް ބޮޑެތި ގެއްލުންތައް ވާނޭ ގޮތަށެވެ. އެގޮތުން ކަރަންޓާއި ފެން ބިލްތަކުން އެކަނި ވެސް ހަތްދިހަ ހަތް މިލިއަން ރުފިޔާ ނުލިބި އެބައޮތެވެ. އަދި ކުންފުނީގެ އެކައުންޓުން މުވައްޒަފުންގެ އަމިއްލަ އެކައުންޓުތަކަށް ޕެޓީ ކޭޝްއިން ފައިސާ ހަރަދު ކުރުމުގައި، މުވައްޒަފުންގެ އާއިލީ ގުޅުން ހުރި ވިޔަފާރިތަކުން ހަތްލައްކަ އަށްޑިހަ ތިންހާސް ދުއިސައްތަ ނުވަދިހަ ހަ ރުފިޔާގެ ތަކެތި ގަނެފައިވާ ކަމަށް ރިޕޯޓުގައި ބުނެފައިވެއެވެ. މީގެ އިތުރުން ލިޔެކިޔުންތައް ފޯޖުކޮށްގެން އެއްލައްކަ ތިރީސްހާސް ދުއިސައްތަ ވިހި ރުފިޔާގެ ޕެޓީ ކޭޝް ނަގާފައިވާތީ، އެ މަޝްރޫއުތަކަށް ޕެޓީ ކޭޝްގެ ގޮތުގައި ހޭދަކުރި ހަތަރެއް ޕޮއިންޓް ތިނެއް މިލިއަން ރުފިޔާގެ ތެރެއިން ސައިޓުތަކަށް ހަގީގަތުގައި ލިބުނީ ކިހާ ތަކެއްޗެއްކަން ކަށަވަރު ނުވާ ކަމަށް އޮޑިޓް ރިޕޯޓުގައިވެއެވެ.
ރިޕޯޓުގައި ބުނެފައިވާ ގޮތުން ދެހާސް އެކާވީސް ވަނަ އަހަރުން ފެށިގެން ދެހާސް ސައުވީސް ވަނަ އަހަރުގެ ޖޫން މަހުގެ ނިޔަލަށް ފެނަކައިން އިންހައުސްކޮށް ހަތަރު މަޝްރޫއެއް ކުރިއަށް ގެންގޮސްފައިވެއެވެ. އެ މަޝްރޫއުތަކަށް އެއްލައްކަ ސަތާރަ މިލިއަން ރުފިޔާ ހަރަދުކޮށްފައިވީ ނަމަވެސް، އެ މަސައްކަތްތައް އެއްކޮށް ނިންމާލުމަށް އިތުރު ފަސްދޮޅަސް އަށެއް މިލިއަން ރުފިޔާ ހަރަދުވާނެ ކަމަށް ލަފާކުރެވެއެވެ. އެހެންކަމުން މި މަޝްރޫއުތައް ބޭނުންކުރެވޭ ފަދަ ހާލަތަކަށް ގެނައުމަށް ޖުމްލަ އެއްސަތޭކަ އަށްޑިހަ ފަސް މިލިއަން ރުފިޔާ ހޭދަވާނެ ކަމަށް އޮޑިޓް އޮފީހުން ވަނީ ލަފާކޮށްފައެވެ.
