ގއ. ގެމަނަފުށީގައި އިމާރާތްކުރާ އާ ޕޮލިސް ސްޓޭޝަނުގެ ޓައި ބީމް ޝަޓަރިންގ މަސައްކަތްތައް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީއިން) ނިންމާލައިފިއެވެ.
މި މަސައްކަތް ނިމުމަކީ އިމާރާތުގެ ބިންގަލާއި އޮނިގަނޑުގެ ވަރުގަދަކަން ކަށަވަރުކުރުމަށް އެޅުނު މުހިންމު ފިޔަވަޅެކެވެ. ޓައި ބީމަކީ އިމާރާތުގެ ބިންގާ އެއްބަނޑުކޮށް ހިފަހައްޓައިދޭ މައިގަނޑު ބަޔަށް ވާއިރު، މި މަރުހަލާ ނިމުމުން ދެން ކުރިއަށްދާނީ ކޮންކްރީޓް އެޅުމާއި ރޭނުމުގެ މަސައްކަތްތަކެވެ.
ޕަބްލިކް ސެކްޓަރ އިންވެސްޓްމަންޓް ޕްރޮޤްރާމްގެ ދަށުން ގއ. ގެމަނަފުށީގައި ޤާއިމުކުރާ ޕޮލިސް ސްޓޭޝަންގެ ޓައި ބީމް ޝަޓަރިންގ މަސައްކަތް ވަނީ ނިމިފައި.#TeamRDC pic.twitter.com/sPgMlC6I1E
— Road Development Corporation Ltd (@rdcmaldives) July 14, 2026
ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީ.އެސް.އައި.ޕީ) ގެ ދަށުން ގެމަނަފުށީގައި ކުރިއަށްދާ މި މަޝްރޫއަކީ ރާއްޖޭގެ ހުރިހާ މީހުން ދިރިއުޅޭ ރަށްތަކެއްގައި ފުލުހުންގެ ހިދުމަތް ފުޅާކޮށް، ލާމަރުކަޒީ އުސޫލުން ސަލާމަތީ ކަންކަން ވަރުގަދަކުރުމަށް ސަރުކާރުން ގެންގުޅުއްވާ ސިޔާސަތުގެ ދަށުން ހިންގޭ މަޝްރޫއެކެވެ.
މީގެ ބޭނުމަކީ ރަށްރަށުގައި ދިމާވާ ހާދިސާތަކަށް އަވަހަށް އިޖާބަދިނުމާއި، ފުލުހުންނަށް މަސައްކަތްކުރާނެ އެކަށީގެންވާ ޒަމާނީ މާހައުލެއް ގާއިމުކޮށްދިނުމެވެ.
މި ސްޓޭޝަނުގެ މަސައްކަތް އެއްކޮށް ނިމުމުން، މިއީ ގއ. އަތޮޅުގެ ކުށްމަދުކުރުމަށާއި އަމާންކަން ގާއިމުކުރުމަށް ކުރެވޭ މަސައްކަތްތަކުގެ މައި މަރުކަޒަކަށް ވެގެންދާނެއެވެ.
މި އިމާރާތުގައި ފުލުހުންގެ އިދާރީ އޮފީސްތަކުގެ އިތުރުން، ޒަމާނީ މިންގަނޑުތަކަށް ފެތޭ ބަންދުކުރާ ކޮޓަރިތަކާއި، ރައްޔިތުންނާ ގާތުން ހިދުމަތްދެވޭނެ އިންތިޒާމުތައް ގާއިމުކުރެވިގެންދާނެއެވެ.
