ލުބުނާނުގެ ވެރިރަށް ބައިރޫތަށް ދޭން ރާވާފައިވާ ހަމަލާތައް ވަގުތުން ހުއްޓާލުމަށް އަންގައި އެމެރިކާގެ ރައީސް ޑޮނަލްޑް ޓްރަމްޕް، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއަށް ވަރަށް ހަރުކަށި އިބާރާތުން އިންޒާރު ދެއްވައިފި ކަމަށް ރިޕޯޓްތައް ބުނެފިއެވެ.
އެމެރިކާގެ އޮފިޝަލުންނާ ހަވާލާދީ މީޑިއާތަކުން ރިޕޯޓްކޮށްފައިވާ ގޮތުގައި، މިދިޔަ ހޯމަ ދުވަހު ޓްރަމްޕް ވަނީ ނަތަންޔާހޫއަށް ފޯނުން ގުޅުއްވައި، އޭނާގެ އަމަލުތަކަށް ވަރަށް ބޮޑަށް ފާޑުވިދާޅުވެފައެވެ.
ބައިރޫތުގެ ދެކުނުގެ ސަރަހައްދުތަކުގައި ހުރި ހިޒްބުاللهގެ އަމާޒުތަކަށް ހަމަލާދިނުމަށް އިސްރާއީލުން ނިންމާފައިވާ ނިންމުމަކީ، އެމެރިކާއާއި އީރާނާ ދެމެދު ކުރިއަށްދާ ސުލްހައިގެ މަޝްވަރާތަކަށް ހުރަސް އެޅޭނެ ކަމެއް ކަމަށް ވިދާޅުވެ ޓްރަމްޕް ވަނީ ކަންބޮޑުވުން ފާޅުކުރައްވާފައެވެ.
މި ފޯނު ކޯލަށްފަހު، ޓްރަމްޕްގެ 'ޓްރޫތް ސޯޝަލް' މީޑިއާގައި ކުރެއްވި ޕޯސްޓެއްގައި ވިދާޅުވީ، ނަތަންޔާހޫއާއެކު ކުރެވުނު މަޝްވަރާތަކަކީ ނަތީޖާ ނެރެވުނު މަޝްވަރާތަކެއް ކަމަށެވެ.
އަދި އިސްރާއީލު ސިފައިންގެ ފައުޖެއް ބައިރޫތަށް ނުވަންނާނެ ކަމަށާއި، މިހާރުވެސް އެ ސަރަހައްދަށް މިސްރާބު ޖަހާފައިވާ ފައުޖުތައް އަނބުރާ ގޮސްފައިވާ ކަމަށް އޭނާ ވިދާޅުވިއެވެ. މީގެ އިތުރުން، ހިޒްބުالله އާއެކު ކުރެވުނު މަޝްވަރާތަކުން ދެ ފަރާތުން ހަމަލާތައް ހުއްޓާލުމަށް އެއްބަސްވެފައިވާ ކަމަށްވެސް ޓްރަމްޕް ފާހަގަކުރެއްވިއެވެ.
އިސްރާއީލުގެ ބޮޑުވަޒީރުގެ އޮފީހުން ބުނެފައިވަނީ، ލުބުނާނުގެ ދެކުނުގައި ކުރިއަށްދާ އަސްކަރީ އޮޕަރޭޝަންތައް ރޭވިފައިވާ ގޮތަށް ކުރިއަށްދާނެ ކަމަށެވެ. ނަމަވެސް، ހިޒްބުالله އިން އިސްރާއީލަށް ހަމަލާ ނުދޭނަމަ، ބައިރޫތަށް ދޭން ނިންމާފައިވާ ހަމަލާތައް ވަގުތީ ގޮތުން ފަސްކޮށްފައިވާ ކަމަށް އެ އޮފީހުން ވަނީ އިޝާރާތްކޮށްފައެވެ.
މިކަމުން ދޭހަވަނީ، މެދުއިރުމަތީގެ މަސްލަހަތު ދެމެހެއްޓުމަށްޓަކައި އެމެރިކާއިން އިސްރާއީލަށް ކުރަމުންދާ ފިއްތުންތައް އިތުރުވެފައިވާ މިންވަރެވެ.
