ޞުލްޙައިގެ މަޝްވަރާތައް ނާކާމިޔާބުވުމާ ގުޅޭގޮތުން އެމެރިކާއާއި އީރާނުން ދަނީ ތަފާތު ސަބަބުތަކެއް ދައްކަމުންނެވެ.
އީރާނުގެ ދައުލަތުގެ މީޑިއާއިން ރިޕޯޓްކޮށްފައިވާ ގޮތުގައި، ހަނގުރާމަ ހުއްޓާލުމަށް ކުރެވުނު މަޝްވަރާތައް ހުއްޓުމަކަށް އައީ އެމެރިކާއިން ކުރި "ހަމަޖެހޭ އުސޫލެއް ނެތް ޑިމާންޑްތަކުގެ" ސަބަބުންނެވެ.
އީރާނުގެ ދައުލަތުގެ ބްރޯޑްކާސްޓަރު އައި.އާރު.އައި.ބީ އިން ޓެލެގްރާމްގައި ކުރި ޕޯސްޓެއްގައި ބުނެފައިވަނީ، އީރާނުގެ ވަފުދުން ތަފާތު އެކި އިސްނެގުންތަކެއް ހުށަހެޅި ނަމަވެސް، އެމެރިކާގެ ފަރާތުން ކުރި ދޫނުދޭ އަމަލުތަކުގެ ސަބަބުން މަޝްވަރާތައް ކުރިއަށް ނުގޮސް ނިމިފައިވާ ކަމަށެވެ.
ނަމަވެސް، އެމެރިކާއިން ބުނަމުންދަނީ އެ ގައުމުން އަމަލުކުރީ ވަރަށް ބޮޑަށް ދޫދީގެން އަދި އެއްބަސްވުމަކަށް އައުމުގެ ނިޔަތުގައި ކަމަށެވެ.
ވޭންސް ވިދާޅުވި ގޮތުގައި، އެމެރިކާގެ ރައީސް ޑޮނަލްޑް ޓްރަމްޕް އޭނާއަށް އިރުޝާދު ދެއްވީ އިޚްލާޞްތެރިކަމާއެކު މަޝްވަރާގައި ބައިވެރިވެ، އެއްބަސްވުމަކަށް އައުމަށް ކުރެވެން ހުރި ހުރިހާ މަސައްކަތެއް ކުރުމަށެވެ.
އޭނާ އިތުރަށް ވިދާޅުވީ، އެމެރިކާއިން އެ މަސައްކަތް ކުރި ކަމަށާއި، ނަމަވެސް ހިތާމައަކީ އެއްވެސް ކުރިއެރުމެއް ލިބިފައި ނުވާތީ ކަމަށެވެ. އަދި އޭނާ އެނބުރި ވަޑައިގަންނަވަނީ އެންމެ ފަހުގެ ހުށަހެޅުމެއްގެ ގޮތުގައި ވަރަށް ސާދާ އަދި އެކަށީގެންވާ ހުށަހެޅުމެއް ހުށަހެޅުމަށްފަހު ކަމަށްވެސް ވިދާޅުވިއެވެ.
ދެ ހަފުތާގެ މުއްދަތަށް ހަނގުރާމަ ހުއްޓާލުމަށް ހުށަހެޅި އެއްބަސްވުމާ ގުޅޭގޮތުން ދެން އަމަލުކުރާނެ ގޮތެއް ނުވަތަ އިތުރު މަޝްވަރާތަކެއް ބާއްވާނެކަން ނުވަތަ ނޫންކަން އަދި ސާފެއް ނުވެއެވެ.
