އދ.ގެ އާންމު މަޖިލީހުގެ ހަވާސާގައި އެމެރިކާއާއި އީރާނުގެ އިސް މަސްއޫލުވެރިންގެ ދެމެދުގައި ތިން ގަޑިއިރަށް ދެމިގެންދިޔަ މުހިންމު މަޝްވަރާތަކެއް ބޭއްވިފައިވާ ކަމަށާއި، މިއީ ވަރަށް ކާމިޔާބު މަޝްވަރާތަކެއް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ ވިދާޅުވެފައެވެ.
ނިއުޔޯކްގައި ނޫސްވެރިންނާ ވާހަކަދައްކަވަމުން ޓްރަމްޕް ހާމަކުރެއްވި ގޮތުގައި، ދެ ގައުމުގެ ދެމެދުގައި އުފެދިފައިވާ ނުތަނަވަސްކަމަށް ހައްލެއް ހޯދުމަށް ކުރިއަށް އޮތް ކައިރި މުސްތަގުބަލެއްގައި އިތުރު ބައްދަލުވުމެއް ބޭއްވުމަށްވެސް ވަނީ ހަމަޖެހިފައެވެ.
މި މަޝްވަރާތަކުގައި އެމެރިކާގެ ހާއްސަ މަންދޫބުން ކަމަށްވާ ސްޓީވް ވިޓްކޯފްއާއި ޖެރަޑް ކުޝްނާ ބައިވެރިވެވަޑައިގެންނެވި އިރު، އީރާނުގެ މަންދޫބުންގެ އިސްކޮށް ހުންނެވީ ހާރިޖީ ވަޒީރު އަައްބާސް އަރާގްޗީއެވެ. ގަތަރާއި ޕާކިސްތާން މެދުވެރިވެގެން ކުރިއަށްދިޔަ މި މަޝްވަރާތަކުގައި އީރާނުން ވަނީ ހޯރްމުޒް ކަނޑުއޮޅި އަލުން ހުޅުވާލުމަށާއި، އެ ގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލުމާ ގުޅޭގޮތުން އެ ގައުމުގެ ޝަރުތުތައް ހުށަހަޅާފައެވެ.
އދ.ގެ އާންމު މަޖިލީހުގައި ތަގުރީރު ކުރައްވަމުން ޓްރަމްޕް ވަނީ އީރާނަށް ދެ އިޚްތިޔާރެއް އޮތް ކަމަށް ވިދާޅުވެފައެވެ. އެއީ އެއްބަސްވުމަކަށް އައިސް ގައުމު އާރާސްތުކޮށް ކުރިއެރުން ހޯދުން އެމެރިކާގެ އަސްކަރީ ބާރުގެ ކުރިމަތީގައި ނެތިދިއުން ކަމަށް އޭނާ ވިދާޅުވިއެވެ. އެހެންނަމަވެސް، މަޝްވަރާތަކަށްފަހު ޓްރަމްޕް ވަނީ އީރާނާއެކު އެއްބަސްވުމަކަށް ވާސިލުވުމަކީ ދެ ގައުމަށްވެސް އެންމެ ފައިދާހުރި ގޮތް ކަމަށް ވިދާޅުވެ، ކުރިއަށް ހުރި މަޝްވަރާތަކާމެދު އުއްމީދު ބޮޑުކަން ހާމަކުރައްވާފައެވެ.
