ލުބްނާނުގެ ދެކުނުގެ ސަރަޙައްދަކަށް އިސްރާއީލުން ދިން ވައިގެ ވަރުގަދަ ޙަމަލާއެއްގައި އެއް ޢާއިލާއަކަށް ނިސްބަތްވާ ތިން ޖީލުގެ މީހުން ޝަހީދުވެއްޖެއެވެ. ޢާންމުން ދިރިއުޅޭ ސަރަޙައްދަކަށް އަމާޒުކޮށް ދިން މި ނުރައްކާތެރި ޙަމަލާގައި އެ ޢާއިލާގެ ގިނަ ބަޔަކު ވަނީ އެއްފަހަރާ މަރުވެފައެވެ.
އިސްރާއީލުގެ އަސްކަރިއްޔާއިން ދެމުންދާ ވައިގެ ޙަމަލާތަކުގައި އެ ޢާއިލާ ދިރިއުޅެމުން ދިޔަ ޢިމާރާތް އެއްކޮށް ބިމާ ހަމަވެފައިވާ ކަމަށް މަޢުލޫމާތު ލިބެއެވެ. މަރުވި މީހުންގެ ތެރޭގައި އެއް ޢާއިލާއެއްގެ ކާފަ އަދި މާމަގެ އިތުރުން، އެމީހުންގެ ދަރިންނާއި ކުދިބޮޑު މާމަދަރިން ހިމެނޭކަން ވަނީ ކަށަވަރުވެފައެވެ.
ލުބްނާނުގެ ދެކުނުގެ ރަށްތަކަށް އިސްރާއީލުން ދެމުންދާ ޙަމަލާތައް ފަހަކަށް އައިސް ވަނީ ވަރަށް ބޮޑަށް އިތުރުވެފައެވެ. މިފަދަ ޙަމަލާތަކުގެ ސަބަބުން ކުށެއްނެތް އެތައް ޢާންމު ރައްޔިތުންނެއްގެ ފުރާނަ ގެއްލެމުންދާއިރު، އެ ސަރަޙައްދުތަކުގައި ދިރިއުޅޭ ރައްޔިތުން ދަނީ ރައްކާތެރި ހިސާބުތަކަށް ބަދަލުވުމަށް މަސައްކަތް ކުރަމުންނެވެ.
ހަނގުރާމައިގެ ޙާލަތު ދުވަހެއް ދުވަހަކަށް ގޯސްވަމުންދާތީ، އެ ސަރަޙައްދުގެ މަސްރަޙު އިތުރަށް ނުރައްކާވެދާނެ ކަމުގެ ބިރު ވަނީ ބޮޑުވެފައެވެ. މުޅި ޢާއިލާ އެއްކޮށް ނެތިދިޔަ މި ހާދިސާއާ ގުޅިގެން ޢާންމުންގެ މެދުގައި ބޮޑު ހިތާމައަކާއި ބިރުވެރިކަމެއް ވަނީ އުފެދިފައެވެ.
