އިސްރާއީލުން ގާޒާއާ ދެކޮޅަށް އަޅާފައިވާ ވަރުގަދަ ކަނޑުގެ ބަންދު އުވާލައި، ފަލަސްތީނުގެ ރައްޔިތުންނަށް އެހީތެރިކަން ފޯރުކޮށްދިނުމުގެ ގޮތުން ފްރީޑަމް ފްލޯޓިލާ ކޯލިޝަނުން އާ ކަނޑުދަތުރުގެ މިޝަނެއް ފަށައިފިއެވެ. ބައިނަލްއަގުވާމީ އިންސާނީ ހައްގުތަކަށް މަސައްކަތްކުރާ ފަރާތްތަކާއި އެކްޓިވިސްޓުން ގުޅިގެން ކުރިއަށްގެންދާ މި ދަތުރުގައި ބައިވެރިވާ އުޅަނދުތައް މިހާރު ދަނީ ޔޫރަޕުގެ އެކި ބަނދަރުތަކުން ފުރައިގެން ދަތުރުކުރަމުންނެވެ.
މި މިޝަންގެ މައިގަނޑު އަމާޒަކީ ކުރިއަށް އޮތް އޮކްޓޯބަރު މަހުގެ ތެރޭގައި ގާޒާގެ އައްސޭރިފަށަށް ވާސިލުވުމެވެ. މި ދަތުރުގައި އިނގިރޭސިވިލާތާއި ސްކެންޑިނޭވިއާގެ ގައުމުތަކުން ފުރި އުޅަނދުތައް ހިމެނޭއިރު، މެޑިޓެރޭނިއަން ކަނޑު ހުރަސްކޮށް ގާޒާއަށް ދިއުމުގެ ކުރިން ސްޕެއިން، ޕޯޗުގަލް އަދި އިޓަލީގެ ބަނދަރުތަކަށް އެ އުޅަނދުތައް ބަނދަރުކުރުމަށް ވަނީ ހަމަޖެހިފައެވެ.
މި އުޅަނދުތަކުގައި އިންސާނީ ހައްގުތަކަށް މަސައްކަތްކުރާ ފަރާތްތަކުގެ އިތުރުން ސިއްހީ މާހިރުންނާއި ނޫސްވެރިން އަދި އެކި ގައުމުތަކުގެ އިންތިހާބީ މަންދޫބުން ބައިވެރިވެއެވެ. އެ ފަރާތްތަކުން ޔޫރަޕުގެ ބަނދަރުތަކުގައި ހަރަކާތްތެރިވަމުން ދަނީ އިސްރާއީލަށް ހަތިޔާރާއި ހަކަތަ ފޯރުކޮށްދިނުން ހުއްޓުވުމަށް އެ ގައުމުތަކުގެ ސަރުކާރުތަކަށް ބާރުއެޅުމަށެވެ.
މީގެ ކުރިން ވެސް ގާޒާގެ ބަންދު އުވާލުމަށް ބައިނަލްއަގުވާމީ ފަރާތްތަކުން ފޮނުވި ފްލޯޓިލާތަކަށް އިސްރާއީލުގެ އަސްކަރިއްޔާއިން ވަނީ ހުރަސްއަޅައި، އެތައް ސަތޭކަ އެކްޓިވިސްޓުންނެއް ހައްޔަރުކޮށްފައެވެ. ނަމަވެސް އެފަދަ ނުރައްކާތަކާ އެކު ވެސް، ގާޒާގެ ރައްޔިތުން ތަހައްމަލުކުރަމުންދާ ހިތްދަތި ހާލަތަށް ދުނިޔޭގެ ސަމާލުކަން ހޯދުމަށް މި ދަތުރު ކުރިއަށް ގެންދާނެ ކަމަށް އިންތިޒާމުކުރާ ފަރާތްތަކުން ބަޔާންކުރެއެވެ.
ފްރީޑަމް ފްލޯޓިލާ ކޯލިޝަނުން ވަނީ އެ އުޅަނދުތަކަށް ރައްކާތެރިކަމާއެކު ދަތުރުކުރުމުގެ ފުރުސަތު ކަށަވަރުކޮށްދިނުމަށާއި، އިސްރާއީލުން ގާޒާއާ ދެކޮޅަށް އަޅާފައިވާ ބަންދު ނިމުމަކަށް ގެނައުމަށް ބައިނަލްއަގުވާމީ ދުނިޔެއަށް ގޮވާލާފައެވެ.
