މެދުއިރުމަތީގައި އެމެރިކާ އާއި އީރާނާ ދެމެދު ހިނގަމުންދާ ވަރުގަދަ އަސްކަރީ ކުރިމަތިލުންތަކުގެ ތެރެއިން، އީރާނުން ދިން މިސައިލާއި ޑްރޯން ހަމަލާތަކަކާ ގުޅިގެން ކުވެއިތު އިންޓަނޭޝަނަލް އެއާޕޯޓުގައި ފްލައިޓްތައް ޖެއްސުމާއި ފުރުން ވަގުތީ ގޮތުން ހުއްޓާލައިފިއެވެ. މިކަން ކުވެއިތުގެ ގައުމީ އެއާލައިން ކަމަށްވާ ކުވެއިތު އެއާވޭސްއިން ވަނީ ރަސްމީކޮށް ކަށަވަރުކޮށްދީފައެވެ.
ކުވެއިތު އެއާވޭސްއިން ސޯޝަލް މީޑިއާގައި އާންމުކުރި ބަޔާނެއްގައި ބުނެފައިވަނީ، ގައުމުގެ ވައިގެ ސަރަހައްދު ކުއްލި ގޮތަކަށް ބަންދުކުރުމާ ގުޅިގެން، އެ އެއާލައިނުން ދަތުރުކުރަން ހަމަޖެހިފައިވާ މައިގަނޑު ހުރިހާ ފްލައިޓްތަކެއް މިހާރު ރީޝެޑިއުލް ކުރަން ޖެހިފައިވާ ކަމަށެވެ. އަދި ދަތުރުވެރިންގެ ސަލާމަތާއި ރައްކާތެރިކަމަށްޓަކައި ސިވިލް އޭވިއޭޝަންގެ އިރުޝާދުގެ ދަށުން އެޅި މި ފިޔަވަޅާ ގުޅިގެން، ފްލައިޓްތަކަށް އަންނަ ބަދަލުތައް މެސެޖު މެދުވެރިކޮށް ފަސިންޖަރުންނަށް އަންގަމުންދާނެ ކަމަށްވެސް އެއާލައިނުން ބުނެއެވެ.
މި ފިޔަވަޅު އަޅާފައިވަނީ އީރާނުން ކުވެއިތުގެ ދެކުނުގެ ސަރަހައްދުތަކަށް ދިން މިސައިލް ހަމަލާތަކެއްގެ ސަބަބުން ދެ ސަރަހައްދެއްގައި ބޮޑެތި އަލިފާނުގެ ހާދިސާތަކެއް ހިނގާފައިވާ ދަނޑިވަޅެއްގައެވެ. ކުވެއިތުގެ ފަޔަރ ފޯސްއިން ބުނި ގޮތުގައި އެ އަލިފާންގަނޑުތައް މިހާރު ވަނީ ކޮންޓްރޯލް ކުރެވިފައެވެ.
އީރާނުގެ އައިއާރްޖީސީން ކުރިން ބުނެފައިވަނީ، އެމެރިކާއިން އީރާނަށް ދެމުންދާ ހަމަލާތަކަށް ރައްދު ދިނުމުގެ ގޮތުން، ކުވެއިތުގައި ހުންނަ އެމެރިކާގެ އަސްކަރީ މަރުކަޒުތަކަށް (ޚާއްޞަކޮށް ޢަލީ އަލް ސާލިމް އެއާ ބޭސްއަށް) އަމާޒުކޮށް ހަމަލާތައް ދޭނެ ކަމަށެވެ. މި ހަމަލާތަކުގެ ސަބަބުން ކުވެއިތުގެ އިތުރުން ބަހުރޭން އަދި އުރުދުންގެ ވައިގެ ސަރަހައްދުތަކަށްވެސް ވަނީ ބޮޑެތި ބުރޫތަކެއް އަރާފައެވެ.
މެދުއިރުމަތީގެ މަސްރަހު ނުރައްކާތެރި ދަރަޖައަކަށް ގޮސްފައިވާތީ، ސިންގަޕޯ އެއާލައިންސް އާއި އެއާ ފްރާންސް ހިމެނޭހެން ބައިނަލްއަގުވާމީ ގިނަ އެއާލައިންތަކަކުން ދަނީ ގަލްފުގެ ސަރަހައްދުން ކުރާ ދަތުރުތައް ސަސްޕެންޑް ކުރަމުންނެވެ.
ކުވެއިތުގެ ވައިގެ ދިފާއީ ނިޒާމުތަކުން ދަނީ އީރާނުން ފޮނުވާލާ ކްރޫޒް މިސައިލްތަކާއި ޑްރޯންތައް ވައިގެ ތެރޭގައި ގޮއްވާލަމުންނެވެ. އެހެންކަމުން މަސްރަހު ފިނިވަންދެން އެއާޕޯޓުގެ އޮޕަރޭޝަންތައް އާންމު ހާލަތަކަށް ނާންނާނެ ކަމަށް އަސްކަރީ މާހިރުން ލަފާކުރެއެވެ.
