ޗައިނާގެ ކޮމިއުނިސްޓް ޕާޓީއާ ދެކޮޅަށް ފާޅުގައި ވާހަކަދައްކަމުން ދިޔަ، އަދި އެމެރިކާގައި އަމިއްލައަށް އަރުވާލެވިގެން އުޅުނު ޗައިނާގެ ބިލިއަނަރު ގުއޯ ވެންގުއީ (މައިލްސް ގުއޯ) 30 އަހަރަށް ޖަލަށްލުމަށް އެމެރިކާގެ ކޯޓަކުން ހުކުމްކޮށްފިއެވެ. މިއީ ސިޔާސީ ހަރަކާތްތަކާއި މާލީ މަކަރާއި ހީލަތް އެއްކޮށްލައިގެން އޭނާ ހިންގި ބޮޑު ޖަރީމާގެ ނިމުމެވެ.
ގުއޯ ވެންގުއީ އަކީ ކުރިން ޗައިނާގެ ރިއަލް އެސްޓޭޓް ދާއިރާގެ ބޮޑު މަހުޖަނެކެވެ. ނަމަވެސް 2014 ވަނަ އަހަރު ޗައިނާ ސަރުކާރުން އޭނާގެ މައްޗަށް ކޮރަޕްޝަނުގެ ދަޢުވާ އުފުލަން ތައްޔާރުވުމުން އޭނާ ވަނީ އެމެރިކާއަށް ފިލާފައެވެ.
އެމެރިކާއަށް ދިއުމަށްފަހު، އޭނާ ވަނީ ޗައިނާގެ ކޮމިއުނިސްޓް ޕާޓީއާ ދެކޮޅު ވިސްނުމެއް ގެންގުޅޭ އެތައް ލައްކަ ބައެއްގެ ތާއީދު ހޯދައި، ސޯޝަލް މީޑިއާގައި ބޮޑު މަގުބޫލުކަމެއް ހޯދާފައެވެ. އަދި އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ އަރިސް ބޭފުޅެއް ކަމަށްވާ ސްޓީވް ބެނަންއާ ގުޅިގެން 2020 ވަނަ އަހަރު "ނިއު ފެޑެރަލް ސްޓޭޓް އޮފް ޗައިނާ" ގެ ނަމުގައި ސިޔާސީ ހަރަކާތެއްވެސް އޭނާ ފެށިއެވެ.
އެމެރިކާގެ މެންހަޓަންގެ ޕްރޮސެކިއުޓަރުން ސާބިތުކޮށްދިން ގޮތުގައި، ގުއޯ ވަނީ އޭނާގެ ސިޔާސީ ހަރަކާތްތަކާއި ޗައިނާ ސަރުކާރާ ދެކޮޅު ފިކުރު އައްޑަނައަކަށް ބޭނުންކޮށްގެން، އޭނާއަށް ތާއީދުކުރާ އާންމު އިންވެސްޓަރުންގެ އަތުން 1 ބިލިއަން އެމެރިކާ ޑޮލަރަށްވުރެ ގިނަ ފައިސާ އޮޅުވާލައިގެން އަތުލާފައެވެ.
އޭނާ މި ފައިސާ ހޯދާފައިވަނީ މީޑިއާ ކުންފުންޏެއް ކަމަށްވާ "ޖީޓީވީ މީޑިއާ ގްރޫޕް" އާއި، "ހިމާލަޔާ ފާމް އެލަޔަންސް" އަދި "އެޗް-ކޮއިން" ނަމަކަށް ކިޔާ ކްރިޕްޓޯކަރަންސީއެއް އުފައްދައި، އެ ތަންތަނުން ބޮޑު ފައިދާ ލިބޭނެ ކަމަށް ދޮގުވައުދުތައް ވެގެންނެވެ.
އިންވެސްޓަރުން އަތުން ހޯދި ފައިސާ ވިޔަފާރިތަކަށް ޚަރަދުކުރުމުގެ ބަދަލުގައި، ގުއޯ ބޭނުންކުރީ އޭނާގެ އަމިއްލަ އަގުބޮޑު ދިރިއުޅުމުގެ ބޭނުންތަކަށެވެ. މިއީ އިންވެސްޓަރުންގެ ފައިސާއިން އޭނާ އަމިއްލައަށް އުފެއްދި "ޕިގީ ބޭންކެއް" ކަން ޝަރީޢަތުގައި ވަނީ ސާބިތުވެފައެވެ.
މި މައްސަލައިގެ ތަޙުޤީޤުގައި އޭނާގެ އަތުން އަތުލައިގަތް ތަކެތީގެ ތެރޭގައި 37 މިލިއަން ޑޮލަރުގެ އަގުބޮޑު ޔޮޓަކާއި (މިއީ ސްޓީވް ބެނަން އެފްބީއައި އިން ހައްޔަރުކުރި ޔޮޓެވެ)، ނިއު ޖަރސީގައި ހުރި 50،000 އަކަފޫޓުގެ ބޮޑު ގަނޑުވަރެއް ފަދަ ގެއަކާއި، 4.4 މިލިއަން ޑޮލަރުގެ ބުގާޓީ ކާރަކާއި، 3.5 މިލިއަން ޑޮލަރުގެ ފެރާރީ ކާރެއް ހިމެނެއެވެ. މީގެ އިތުރުން 36،000 ޑޮލަރުގެ ގޮދަޑިއަކާއި މިލިއަނުން އަގުހުރި ގަހަނާތަކާއި ކާޕެޓްތައްވެސް އަތުލައިގަތެވެ.
ގުއޯ ވެންގުއީ އެމެރިކާގެ އެފްބީއައި އިން ހައްޔަރުކުރީ 2023 ވަނަ އަހަރުގެ މާރިޗު މަހު އޭނާ ދިރިއުޅެމުންދިޔަ މެންހަޓަންގެ ލަގްޒަރީ އެޕާޓްމަންޓުންނެވެ. އަދި 2024 ވަނަ އަހަރުގެ ޖުލައި މަހު ނިއުޔޯކްގެ ކޯޓެއްގައި ކުރިއަށްދިޔަ ޝަރީޢަތަށްފަހު، އޭނާގެ މައްޗަށް ހުށަހެޅުނު 12 ދަޢުވާގެ ތެރެއިން 9 ދަޢުވާއެއް ސާބިތުވާކަމަށް ޖޫރީން ވަނީ ނިންމާފައެވެ. އޭގެތެރޭގައި މަނީ ލޯންޑްރިންގ އާއި، ސެކިއުރިޓީޒް ފްރޯޑް އަދި ރެކެޓިއަރިންގ ހިމެނެއެވެ.
ކޯޓުން އިއްވި 30 އަހަރުގެ ޖަލު ހުކުމަކީ، އޭނާއަށް އިތުބާރުކުރި އާންމު އިންވެސްޓަރުންނަށް ދިން ބޮޑު ކެހިވެރިކަމާއި، މާލީ ނިޒާމުގެ ތެރެއިން އޮޅުވާލުންތައް ހިންގުމަށް ހެދި ސިއްރު ކުންފުނިތަކުގެ ޖަރީމާއަށް ދެވުނު ހައްގު އަދަބެއް ކަމަށް ޕްރޮސެކިއުޓަރުން ވަނީ ބުނެފައެވެ.
