އީރާނުގެ ޔުރޭނިއަމް ކޮންމެވެސް ގޮތަކުން އެމެރިކާއަށް ގެންދާނެ ކަމަށް ޓްރަމްޕް ވިދާޅުވެއްޖެއެވެ. އިރާނުން ބުނަނީ އެއީ "ފެށޭނެ ކަމެއް ނޫން" ކަމަށެވެ.
މި މަސައްކަތަށް އެމެރިކާގެ ސިފައިން އެ ގައުމަށް އަރަން ޖެހޭނެތޯ ސީ.ބީ.އެސް އަށް ދެއްވި އިންޓަވިއުއެއްގައި ސުވާލުކުރުމުން ޓްރަމްޕް ވިދާޅުވީ "ނޫން، ސިފައިންނެއް ނުފޮނުވާނަން" ކަމަށެވެ. އޭނާ އިތުރަށް ވިދާޅުވީ "އެމެރިކާއިން އިރާނަށް ގޮސް އެ އެއްޗެހި ނަގާނެ. އަހަރެމެން އެކުގައި އެ މަސައްކަތް ކުރާނީ، ސަބަބަކީ އެ ހިސާބަށް ދާއިރު އެއްބަސްވުމަކަށް އާދެވިފައި އޮންނާނެތީ. އެއްބަސްވުމެއް އޮތް ނަމަ ހަނގުރާމަ ކުރާކަށް ނުޖެހޭނެ."
އޭގެ ފަހުން އެރިޒޯނާގައި ބޭއްވި އެއްވުމެއްގައި، އީރާނާއެކު ވެވިދާނެ އެއްބަސްވުމުގެ މުހިންމު ނުކުތާތައް ބަޔާންކޮށްދެއްވަމުން ޓްރަމްޕު މި ވާހަކަ ތަކުރާރު ކުރެއްވިއެވެ.
"އެމެރިކާއަށް ހުރިހާ "ނިއުކްލިއާ ޑަސްޓް" (ނިއުކްލިއާ ހިރަފުސް) އެއް ލިބޭނެ. ނިއުކްލިއާ ޑަސްޓަކީ ކޮބައިކަން އެނގޭތަ؟ އެއީ އަހަރެމެންގެ ބީ-2 ބޮންއަޅާ ބޯޓުތަކުން އުފެއްދި ހުދު ކުލައިގެ ކުނޑިތަކެއް... ކޮންމެ ގޮތެއްވިޔަސް އަހަރެމެން އެ އެއްޗެހި ނަގާނަން،" އޭނާ ވިދާޅުވިއެވެ. އަދި އިތުރަށް ވިދާޅުވީ "އެކަމަކު އެގޮތަށް އެ އެއްޗެހި ނެގުމަކީ ކުޑަކޮށް ނުރައްކާތެރި ކަމެއް."
ޓްރަމްޕް "ނިއުކްލިއާ ޑަސްޓް" މި ލަފުޒު ބޭނުންކުރައްވަނީ އީރާނުން މުއްސަނދިކޮށްފައިވާ ޔުރޭނިއަމްގެ ރައްކާކުރެވިފައިވާ މިންވަރަށް ނިސްބަތްކުރެއްވުމަށެވެ. ނަމަވެސް މިއީ ނިއުކްލިއާ ހަކަތައިގެ ސިނާއަތުގައި ބޭނުންކުރާ މަޝްހޫރު ލަފުޒެއް ނޫނެވެ.
އީރާނުގެ އިސް އޮފިޝަލަކު ވަނީ ޓްރަމްޕްގެ މި ވާހަކަތަކަކީ "އަލްޓަނޭޓިވް ފެކްޓްސް" (ހަގީގަތާ ހިލާފު ވާހަކަތަކެއް) ކަމަށް ސިފަކުރައްވާފައެވެ. އެ އޮފިޝަލް ވަނީ އީރާނުން މުއްސަނދިކޮށްފައިވާ ޔުރޭނިއަމް އެމެރިކާއަށް ފޮނުވުމަށް އެއްބަސްވެފައިވާ ކަމަށް ބުނާ ވާހަކަ ދޮގުކުރައްވައި، އެއީ "ފެށޭނެ ކަމެއް ނޫން" ކަމަށް ވިދާޅުވެފައެވެ.
އަދި ޔުރޭނިއަމް މުއްސަނދިކުރުން މުއްދަތެއް ނެތް ގޮތަށް ހުއްޓާލުމަށް އީރާނުން އެއްބަސްވެފައިވާ ކަމަށް އެމެރިކާގެ ރައީސް ވިދާޅުވި ވާހަކަވެސް އެ މަސްދަރުން ވަނީ ދޮގުކޮށްފައެވެ. އޭނާ ވިދާޅުވީ ބައިނަލްއަގުވާމީ ގާނޫނުތަކުން އިސްތިސްނާވާ ގައުމަކަށް ވުމަށް އީރާނުން "ދުވަހަކުވެސް އެއްބަސްނުވާނެ" ކަމަށެވެ. އަދި ޔުރޭނިއަމް މުއްސަނދިކުރުމުގެ މައްސަލައަކީ ދެ ފަރާތުގެ މެދުގައި އެއްބަސްނުވެވި އޮތް އެންމެ ބޮޑު އެއް މައްސަލަ ކަމަށްވެސް އޭނާ ވިދާޅުވިއެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ އީރާނުން މުއްސަނދިކޮށްފައިވާ ޔުރޭނިއަމް ކޮންމެވެސް ގޮތަކުން އެމެރިކާއަށް ހޯދާނެ ކަމަށާއި، މަޝްވަރާތައް ނާކާމިޔާބުވެއްޖެ ނަމަ އެ ތަކެތި ގެންދާނީ "މާ ނުރައްކާތެރި ގޮތަކަށް" ކަމުގެ އިންޒާރު ދެއްވާފައެވެ.
އޭނާ ކުރިން ވިދާޅުވެފައިވަނީ އެމެރިކާއާއެކު ކުރެވުނު މަޝްވަރާތަކުގައި އީރާނުން "ހުރިހާ ކަމަކަށް އެއްބަސްވެފައިވާ" ކަމަށެވެ. އޭގެ ތެރޭގައި މުއްސަނދިކޮށްފައިވާ ޔުރޭނިއަމް އެ ގައުމުން ބޭރުކޮށް އެމެރިކާއަށް ގެންދިއުމަށް ގުޅިގެން މަސައްކަތް ކުރުން ހިމެނޭ ކަމަށްވެސް އޭނާ ވިދާޅުވިއެވެ.
