ހަނގުރާމަ ހުއްޓާލުމަށް ދާދިފަހުން ހުށަހެޅި ހުށަހެޅުންތަކާ ގުޅިގެން، އީރާނުން ބޭނުންވާ ކަންތައްތައް ނިންމާފައިވާ ކަމަށާއި، ނަމަވެސް އެކަންކަން ހާމަކުރާނީ އެންމެ މުނާސަބު ވަގުތު ޖެހުމުން ކަމަށް އީރާނުގެ ފޮރިން މިނިސްޓްރީގެ ތަރުޖަމާނު ވިދާޅުވެއްޖެއެވެ.
އީރާނުން އެއްވެސް ފިއްތުމަކަށް ކުޑަކޮށްވެސް ދޫނުދޭނެ ކަމަށް ތަރުޖަމާނު އިސްމާއީލް ބަގާއީ ހަވާލާދީ، އިރްނާ ނިއުސް އެޖެންސީން ރިޕޯޓްކޮށްފައިވެއެވެ.
"މީގެ ދުވަސްކޮޅެއް ކުރިން މެދުވެރިން މެދުވެރިކޮށް އެމީހުން ވަނީ ހުށަހެޅުންތަކެއް ހުށަހަޅާފައި. އަދި އެމެރިކާގެ 15 ނުކުތާގެ ޕްލޭން ވަނީ ޕާކިސްތާނާއި އެހެން ބައެއް އެކުވެރި ގައުމުތައް މެދުވެރިކޮށް ހިއްސާކޮށްފައި،" އޭނާ ވިދާޅުވިއެވެ.
އޭނާ އިތުރަށް ވިދާޅުވީ "މިފަދަ ހުށަހެޅުންތަކަކީ އިންތިހާއަށް ކެރުންތެރި، އާދަޔާ ހިލާފު އަދި ބުއްދިއަށް ގަބޫލުނުކުރެވޭ ތާކުންތާކު ނުޖެހޭ ކަންތައްތައް" ކަމަށެވެ.
އީރާނުގެ އަމިއްލަ އޮނިގަނޑެއް އޮތްކަން ބަގާއީ ފާހަގަކުރެއްވިއެވެ. "އަޅުގަނޑުމެންގެ އަމިއްލަ މަސްލަހަތަށާއި، އަޅުގަނޑުމެން ރިއާޔަތްކުރާ ކަންކަމުގެ މައްޗަށް ބިނާކޮށް، އަޅުގަނޑުމެން ބޭނުންވާ ކަންތައްތަކުގެ ލިސްޓެއް ވަނީ އެކުލަވާލާފައި،" ބަގާއީ އިތުރަށް ވިދާޅުވިއެވެ.
މެދުވެރިންނާ އެކު މުއާމަލާތް ކުރުމަކީ ބަލިކަށިކަމުގެ ނިޝާނެއް ކަމަށް ދެކެވޭ ވާހަކަ ފޮރިން މިނިސްޓްރީގެ ތަރުޖަމާނު ދޮގުކުރެއްވިއެވެ.
"ޕްލޭނަކަށް ޖަވާބު ދިނުމުގައި އީރާނުން ވަރަށް އަވަހަށް އަދި ކެރިގެން ހިޔާލު ފާޅުކުރުމަކީ، ދުޝްމަނުންގެ ކުރިމަތީގައި ކަނޑުއެޅިގެން އަމާންދިނުން ކަމުގައި ބަލައިގެން ނުވާނެ."
"މި މަޝްވަރާ ފެށުނު ހިސާބުން ފެށިގެން އަޅުގަނޑުމެން ވާނީ ޖަވާބުތައް ތައްޔާރުކޮށްފައި. ބޭނުންވާ ކޮންމެ ވަގުތެއްގައި އަޅުގަނޑުމެން ސާފުކޮށް އެކަން އަންގާނަން."
