ދިވެހިރާއްޖޭގެ ނޭޝަނަލް އެޑަޕްޓޭޝަން ޕްލޭން (އެންއޭޕީ) ހަރުދަނާކުރުމަށް ކުރިއަށްގެންދާ މުހިންމު މަޝްރޫޢުގެ ޕްރޮޖެކްޓް ސްޓިއަރިންގ ކޮމިޓީގެ ދެވަނަ ބައްދަލުވުން ކާމިޔާބުކަމާއެކު ބާއްވައިފިއެވެ.
އިއްޔެ ބޭއްވި މި ބައްދަލުވުމުގައި، މިހާތަނަށް މި މަޝްރޫޢުން ހާޞިލުކުރެވިފައިވާ މުހިންމު ކާމިޔާބީތަކާއި މަސައްކަތްތައް ކުރިއަށް ގޮސްފައިވާ މިންވަރު ކޮމިޓީގެ މެންބަރުން ވަނީ ރީވިއު ކުރައްވާފައެވެ. މީގެއިތުރުން، ކުރިއަށް އޮތް 2027 ވަނަ އަހަރަށް ކަނޑައަޅާފައިވާ މަސައްކަތު ތާވަލާއި ބަޖެޓާމެދު ފުޅާ ދާއިރާއެއްގައި މަޝްވަރާކުރެއްވުމަށްފަހު، އެ ތާވަލާއި ބަޖެޓު ކޮމިޓީގެ އިއްތިފާޤުން ވަނީ ރަސްމީކޮށް ފާސްކޮށްފައެވެ.
ނޭޝަނަލް އެޑަޕްޓޭޝަން ޕްލޭނަކީ، މޫސުމަށް އަންނަ ބަދަލުތަކުގެ ނޭދެވޭ އަސަރުތަކުން ރައްކާތެރިވުމަށާއި، އެފަދަ ބަދަލުތަކަށް ހޭނުމަށްޓަކައި ރާއްޖޭގެ ޤައުމީ މުއައްސަސާތަކުގެ ޤާބިލުކަން އިތުރުކުރުމަށް އެކުލަވާލާ ނުހަނު މުހިންމު ޕްލޭނެކެވެ. މި މަޝްރޫޢުގެ ސަބަބުން، މޫސުމާ ގުޅޭ މަޢުލޫމާތު އެއްކުރުމާއި ސައިންޓިފިކް ދިރާސާތައް ކުރުމުގެ ނިޒާމު އިތުރަށް ހަރުދަނާވެ، މޫސުމީ ކަންކަމަށް ޚާއްޞަކުރެވޭ މާލީ ވަސީލަތްތައް އެންމެ އެދެވޭ ގޮތުގައި ބޭނުންކުރުމަށް މަގުފަހިވެގެންދާނެއެވެ.
މި ބައްދަލުވުމުގައި އިތުރަށް ފާހަގަކުރެއްވި ގޮތުގައި، ރާއްޖޭގެ ތަރައްޤީގެ މައިގަނޑު ސިޔާސަތުތައް އެކުލަވާލުމުގައި މޫސުމަށް ހޭނުމުގެ މުހިންމު އަސާސްތައް ހިމަނައިގެން، ޤައުމީ ފެންވަރުގައި ދެމެހެއްޓެނިވި ތަރައްޤީ ކަށަވަރުކުރުމަށް މި މަޝްރޫޢުގެ ސަބަބުން ބޮޑެތި ފައިދާތަކެއް ލިބިގެންދާނެއެވެ.
