ނޭޝަނަލް ކައުންޓާ ޓެރަރިޒަމް ސެންޓަރު (އެންސީޓީސީ) ގެ އިސްވެރިޔާ ނުވަތަ ޑިރެކްޓާ ޖެނެރަލްގެ މަގާމަށް، ކުރީގެ ޑިފެންސް މިނިސްޓަރު އަދި ޗީފް އޮފް ޑިފެންސް ފޯސް، މޭޖަރ ޖެނެރަލް (ރިޓަޔާޑް) މޫސާ އަލީ ޖަލީލް އައްޔަންކުރައްވައިފިއެވެ. ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުން އެމަނިކުފާނު މި މަގާމަށް ހަމަޖެއްސެވީ އިއްޔެގެ ވަގުތެއްގައެވެ.
މިނިސްޓްރީ އޮފް ޑިފެންސްގެ ބެލުމުގެ ދަށުން 2016 ވަނަ އަހަރުން ފެށިގެން ހިންގަމުން އަންނަ އެންސީޓީސީއަކީ، ރާއްޖޭގައި ހަރުކަށި ފިކުރާއި ނިރުބަވެރިކަން ފެތުރުން ހުއްޓުވުމަށާއި، ގައުމީ ސަލާމަތަށް ކުރިމަތިވެދާނެ އެފަދަ ނުރައްކާތަކުން ދިވެހިރާއްޖެ ރައްކާތެރިކުރުމަށް މަސައްކަތްކުރާ މައި މަރުކަޒެވެ.
މި މަގާމަށް އައްޔަންކުރެއްވި މޫސާ އަލީ ޖަލީލަކީ ދިވެހި އަސްކަރިއްޔާގައި 32 އަހަރަށްވުރެ ދިގު މުއްދަތެއްގައި ގައުމަށް އަގުހުރި ހިދުމަތްތަކެއް ކޮށްދެއްވާފައިވާ ބޭފުޅެކެވެ. އެމްއެންޑީއެފްގެ އެންމެ މަތީ މަގާމު ކަމުގައިވާ ޗީފް އޮފް ޑިފެންސް ފޯސްގެ މަގާމު ފުރުއްވުމަށްފަހު، އެ މަނިކުފާނު އަސްކަރީ ހިދުމަތުން ރިޓަޔާ ކުރެއްވީ 2012 ވަނަ އަހަރުގެ ފެބްރުއަރީ މަހުގެ 9 ވަނަ ދުވަހުއެވެ.
ޚާއްޞަކޮށް 1988 ނޮވެމްބަރު 3 ގައި ރާއްޖެއަށް ދިން އުދުވާނީ ހަމަލާއިން ގައުމުގެ މިނިވަންކަން ސަލާމަތկުރުމުގައި އެ މަނިކުފާނު ދެއްކެވި ހިތްވަރާއި ސާބިތުކަމުގެ އަގުވަޒަންކޮށް، ނޮވެމްބަރު ތިނެއްގެ މެޑެއްޔާއި ރައީސުލްޖުމްހޫރިއްޔާގެ މެޑެލްގެ އިތުރުން ޝަރަފުގެ ގިނަ މެޑެލްތަކެއް ވަނީ ލިބިވަޑައިގެންފައެވެ. އަދި ގައުމަށް ކޮށްދެއްވި މަތިވެރި ޚިދުމަތްތަކުގެ އަގުބަލައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވަނީ މޫސާ އަލީ ޖަލީލަށް ދައުލަތުގެ މަތިވެރި އިއްޒަތް ކަމަށްވާ "ނިޝާން އަސްކަރީގެ ވެރިކަމުގެ އިއްޒަތް" (ނ.އ.ވ.އ) ވެސް އަރުވާފައެވެ.
