ގއ. ކޮލަމާފުށީ ބިން ހިއްކުމާއި ގިރާ ސަރަހައްދުތައް ހިމާޔަތްކުރުމުގެ މަޝްރޫޢުގެ ތެރެއިން، ތިމާވެއްޓާ ރައްޓެހި ގޮތަކަށް ފެން ހިންދުމުގެ ނިޒާމު ގާއިމުކުރުމަށްޓަކައި ކުރިއަށްގެންދާ ބަޔޯސްވޭލް ހެދުމުގެ މަސައްކަތްތައް މިހާރު ސައިޓުގައި ބާރަށް ކުރިއަށްދާކަމަށް އެމްޓީސީސީއިން ހާމަކޮށްފިއެވެ.
މި މަޝްރޫޢަކީ ކޮލަމާފުށީގެ ބިމުގެ ޖާގައިގެ ދަތިކަމަށް ހައްލެއް ހޯދައިދިނުމަށާއި، ރަށުގެ އިޤްތިޞާދީ އަދި އިޖުތިމާޢީ ތަރައްޤީއަށް މަގުފަހިކުރުމުގެ މުހިންމު މަޤްޞަދުގައި ސަރުކާރުން ކުރިއަށްގެންދާ ބޮޑު މަޝްރޫޢެކެވެ. މުޅި މަޝްރޫޢުގެ ތެރެއިން ބިން ހިއްކުމުގެ މުހިންމު ބައިތައް ނިމެމުންދާއިރު، ހިއްކާފައިވާ ސަރަހައްދުތައް ގުދުރަތީ ކާރިސާތަކުންނާއި ފެންބޮޑުވުމުން ރައްކާތެރިކުރުމަށްޓަކައި ދެމެހެއްޓެނިވި އިންޖިނިއަރިންގ ހައްލުތައް އަންނަނީ ބޭނުންކުރަމުންނެވެ.
Project Update: Design and build of Land reclamation works at GA. Kolamaafushi
Bioswale works are currently ongoing at the project site.
Follow more updates at: https://t.co/RjAFCf3rnI#MTCCProjects #TeamMTCC #RayyithungeKunfuni #GaumuBinaakurumugaaMTCC pic.twitter.com/mss15pHrP2
— MTCC Plc (@MTCCPlc) October 22, 2026
އެގޮތުން މިހާރު ކުރިއަށްދާ ބަޔޯސްވޭލްގެ މަސައްކަތަކީ، ވާރޭވެހިގެން އެކުލެވޭ ފެން ބޮޑުވިޔަނުދީ، ގުދުރަތީ ގޮތުން ފެން ސާފުކޮށްދީ ކޮންޓްރޯލްކުރުމަށްޓަކައި ގާއިމުކުރެވޭ ޚާއްޞަ ލޭންޑްސްކޭޕިންގ ނިޒާމެކެވެ. މިއީ ތިމާވެއްޓާ ރައްޓެހި ގޮތަކަށް ފެން ހިންދުމުގެ މަސައްކަތްތައް ބައްޓަންކުރުމަށްޓަކައި ޒަމާނީ މަޝްރޫޢުތަކުގައި ބޭނުންކުރާ ނިޒާމެކެވެ.
މި މަޝްރޫޢު ފުރިހަމައަށް ނިމިގެންދާއިރު، ކޮލަމާފުށީގެ ރައްޔިތުންނަށް ގެދޮރުވެރިކަމަށާއި، ވިޔަފާރި އަދި އިޖުތިމާޢީ ކަންކަމަށް ބޭނުންވާނެ އެކަށީގެންވާ ބިން ލިބިގެންދާނެއެވެ. އަދި މީގެ އިތުރުން ރަށުގެ ގިރާ ސަރަހައްދުތައް ބޭކްވޯޓާ އަދި ރިވެޓްމަންޓް ޖަހައިގެން ހިމާޔަތްކުރެވި، މޫސުމީ ބަދަލުތަކުން ރަށަށް ކުރާ ނޭދެވޭ އަސަރުތަކުން ރައްކާތެރިކަން ލިބިގެންދާނެއެވެ.
