ދައުލަތުގެ ވިޔަފާރި ކުންފުނިތަކުގެ ހިންގުން ހަރުދަނާކޮށް, އިތުރަށް ފުރިހަމަ ކުރުމުގެ މަގުސަދުގައި ސަރުކާރުގެ ބައެއް ކުންފުނިތަކުގެ ޑިރެކްޓަރުންގެ ބޯޑަށް އާ މެންބަރުންތަކެއް އައްޔަންކޮށްފިއެވެ.
މި ބަދަލުތައް ގެނެސްފައިވަނީ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ކުންފުނިތަކުގެ ގަވާއިދުތަކާއި އުސޫލުތަކާ އެއްގޮތްވާ ގޮތުގެ މަތިންނެވެ.
މިގޮތުން، މޯލްޑިވްސް ޕޯސްޓް ލިމިޓެޑްގެ ޑިރެކްޓަރުންގެ ބޯޑުގެ މެންބަރުކަމަށް މާލެ ސިޓީ ކައުންސިލްގެ ކުރީގެ ޑެޕިއުޓީ މޭޔަރު، މ. އަހުލިހަ މުހައްމަދު އަރީޝް ވަނީ ހަމަޖައްސާފައެވެ. އަދި ސިއްހީ ދާއިރާއަށް ހާއްސަކޮށްގެން ހިންގާ ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑްގެ ބޯޑަށް އައްޔަންކުރައްވާފައިވަނީ ގދ. ތިނަދޫ ޕެންޒީމާގެ، އިސްމާއީލް ފަރުހާދު އަހްމަދެވެ.
މީގެއިތުރުން، ރާއްޖޭގެ އެންމެ ބޮޑު އެއް ވިޔަފާރި ކުންފުނި ކަމަށްވާ ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ގެ ޑިރެކްޓަރުންގެ ބޯޑަށް ވެސް ވަނީ އާ މެންބަރަކު އައްޔަންކޮށްފައެވެ. އެ މަގާމަށް ހަމަޖައްސާފައިވަނީ ގ. މާޅިކަ، އަހްމަދު އިމްދާހް މުހައްމަދެވެ.
