މާލޭ ގަލޮޅުގައި ހުންނަ ގެއެއްގެ އެޕާޓްމަންޓަކަށް ހުއްދަނޫން ގޮތުގައި ވަދެ، އެތަނުގައި ތިބި މީހުން ހިފަހައްޓައި ތޫނު ހަތިޔާރުން ބިރުދައްކައިގެން ގިނަ އަދަދެއްގެ ފައިސާ ފޭރިގަތް މައްސަލައެއްގައި ދެ މީހަކު ހައްޔަރުކޮށްފިއެވެ.
ފުލުހުން ހާމަކޮށްފައިވާ ގޮތުގައި، މިދިޔަ އޮކްޓޯބަރު މަހުގެ 8 ވަނަ ދުވަހު ހިންގި މި ޖަރީމާގައި އިސްކޮށް އަމަލީ ގޮތުން ބައިވެރިވެފައިވަނީ ގ. ޤަޞްރު، ޠަލާލް މުޙައްމަދު (41އ) އާއި މ. މުލި، ނައިޓްރޯސް، އަޙްމަދު ޢުބައިދު (46އ) އެވެ.
މި މައްސަލައިގެ ތަހުގީގަށް ފުލުހުން ހޯދި ހެކިތަކަށް ބިނާކޮށް، ކޯޓު އަމުރެއްގެ ދަށުން މި ދެ މީހުން ހައްޔަރުކޮށްފައިވަނީ އޮކްޓޯބަރު މަހުގެ 12 ވަނަ ދުވަހުއެވެ. ތަހުގީގު މަރުހަލާގައި އެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، މުޖުތަމައުގެ ސަލާމަތަށް ނުރައްކާވެދާނެ ކަމަށާއި އަދި ހެއްކަށް ނުފޫޒުފޯރުވައިފާނެ ކަމަށް ބަލައި، ޝަރީއަތް ނިމެންދެން ބަންދުގައި ބޭތިއްބުމަށް ކޯޓުން ވަނީ އަމުރުކޮށްފައެވެ.
ފަހަކަށް އައިސް މާލޭގެ އެކި ސަރަޙައްދުތަކުގައި މިފަދަ ނުރައްކާތެރި ފޭރުމުގެ މައްސަލަތަކާއި ރަހީނުކުރުމުގެ އަމަލުތައް ހިންގާ މިންވަރު އިތުރުވަމުންދާތީ، އާންމުންގެ ރައްކާތެރިކަން ކަށަވަރުކުރުމަށްޓަކައި ކަމާބެހޭ މުއައްސަސާތަކުން ދަނީ ޚާއްސަ ފިޔަވަޅުތަކެއް އަޅަމުންނެވެ. މި ހާދިސާއާ ގުޅިގެން އިތުރަށް ބަލަންޖެހޭ ކަންކަން ބަލައި، މިކަމުގައި އިތުރު މީހުން ބައިވެރިވެފައިވޭތޯ ބެލުމަށް ފުލުހުންގެ އިދާރާއިން މިހާރުވެސް ދަނީ މި މައްސަލަ ސީރިއަސް މައްސަލައެއްގެ ގޮތުގައި އިތުރަށް ތަހުގީގުކުރަމުންނެވެ.
