ބައިނަލްއަޤްވާމީ މުދައްރިސުންގެ ދުވަހުގެ މުނާސަބަތުގައި ރައީސުލްޖުމްހޫރިއްޔާގެ އަނބިކަނބަލުން، ފަސްޓް ލޭޑީ ސާޖިދާ މުޙައްމަދު ދެއްވި ޚާއްޞަ މެސެޖެއްގައި، މުދައްރިސުން ބާރުވެރިކޮށް އެ ބޭފުޅުންނަށް ބޭނުންވާ ޒަމާނީ ތައުލީމާއި ފަންނީ ތަމްރީނު ފޯރުކޮށްދިނުމަށް ގޮވާލައްވައިފިއެވެ.
މީސްމީޑިއާ މެދުވެރިކުރައްވައި ފޮނުއްވި މި މެސެޖުގައި، ދަރިވަރުންގެ ހަޔާތަށް ހެޔޮ ބަދަލުތަކެއް ގެނެސްދިނުމުގައި މުދައްރިސުން ކުރައްވާ މިންނެތް މަސައްކަތާއި، އެ ކުދިންނަށް ބަހައްޓަވާ އޯގާތެރިކަން ވަރަށް ޚާއްޞަ ގޮތެއްގައި ފާހަގަކުރައްވާފައިވެއެވެ. އަދި ޤައުމު ފަހުރުވެރިވާފަދަ ހަރުދަނާ ޖީލެއް ބިނާކުރުމުގައި އެދުރުން އަދާކުރައްވަނީ ނުހަނު އަގުހުރި ދައުރެއް ކަމުގައި ވިދާޅުވިއެވެ.
ހަލުވިކަމާއެކު ކުރިއަރަމުން އަންނަ ޒަމާނީ ޓެކްނޮލޮޖީއާއެކު ތައުލީމީ ދާއިރާއަށް އަންނަ ބަދަލުތަކަށް އަލިއަޅުއްވާލައްވަމުން، އެކަމަނާ ފާހަގަކުރެއްވި ގޮތުގައި މިފަދަ ބަދަލުތަކާ ގުޅިގެން މުދައްރިސުންނަށް ކުރިމަތިވާ ގޮންޖެހުންތައް ދަނީ އިތުރުވަމުންނެވެ. އެހެންކަމުން، މިފަދަ ކަންކަމަށް ފައިހަމަކޮށް މުދައްރިސުންގެ ޤާބިލުކަން އިތުރުކުރުމަށްޓަކައި އެކަށީގެންވާ ފަންނީ ތަމްރީނު ޕްރޮގްރާމްތައް ހިންގުމަކީ ކޮންމެހެން ބޭނުންކަމެއްކަމުގައި ވިދާޅުވިއެވެ.
މެސެޖު ނިންމަވާލައްވަމުން، މުދައްރިސުންގެ މަސައްކަތުގެ އަސަރު ހަމައެކަނި ކްލާސްރޫމަށް ހަނިވެފައި ނޯންނާނެކަން ހާމަކުރައްވައި، އެ ބޭފުޅުންގެ ކެތްތެރިކަމާއި ޚިދުމަތްތެރިކަމަށް އިޚްލާޞްތެރިކަމާއެކު ޝުކުރު އަދާކުރެއްވިއެވެ.
