ރާއްޖޭގެ އިގްތިސޯދީ ހާލަތު ކޮޅަށް ނަގައި، ރައްޔިތުންގެ މަސްލަހަތު އިސްކޮށްގެން ގައުމު ތަރައްގީކުރެވޭނެކަމުގެ ޔަގީންކަން ދޭނެ މީހަކު ހުރިނަމަ 2028 ވަނަ އަހަރުގެ ރިޔާސީ އިންތިހާބުން ފަހަތަށް ޖެހިވަޑައިގަންނަވާނެ ކަމަށް ކުރީގެ ރައީސް އަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
އައްޑޫ ފޭދޫގައި ބޭއްވި ޕީއެންއެފްގެ ޖަލްސާގައި ވާހަކަދައްކަވަމުން އެމަނިކުފާނު ވިދާޅުވީ، ސަރުކާރަށް ފާޑުވިދާޅުވަނީ ވެރިކަމުގެ ދަހިވެތިކަމުގައި ނޫން ކަމަށެވެ.
ރާއްޖެއަށް ހަތަރު އަހަރުން ލިބޭނެ އާމްދަނީގެ ދަރަނި ދައުލަތުގައި އޮތުމުން، މިފަދަ ދަނޑިވަޅެއްގައި ގައުމުގެ ރައީސްކަން ކުރުމަކީ ބޮޑު ތަކުލީފެއްކަން ފާހަގަކުރައްވަމުން ޔާމީން ވިދާޅުވީ، އެމަނިކުފާނު ބޭނުންވަނީ ރައްޔިތުން މިހާރު އޮތް ހާލަތުން އަރައިގަންނަން ކަމަށެވެ.
އަދި އިގްތިސޯދީ ތަރައްގީ ގެނެސްދެވޭނެ ގާބިލު މީހަކު އައިސް ކޮންވިންސް ކޮށްދީފިނަމަ، އެ މީހަކަށް ތާއީދުކުރައްވަން ތައްޔާރަށް ހުންނެވި ކަމަށްވެސް ވިދާޅުވިއެވެ.
