މާލޭގައި ފުޅާދާއިރާއެއްގައި ބަނގުރަލުގެ ވިޔަފާރިކުރަމުން ދިޔަ މައްސަލައެއްގައި އިންޑިއާ އަދި ސްރީލަންކާއަށް ނިސްބަތްވާ ދެ ބިދޭސީއަކު ފުލުހުން ހައްޔަރުކޮށްފިއެވެ.
ޑްރަގް އެންފޯސްމަންޓާއި ކައުންޓާ ނާކޮޓިކްސް އިންޓެލިޖެންސް ގުޅިގެން ހިންގި ޚާއްސަ އޮޕަރޭޝަނެއްގައި މާލޭގެ ގެއެއް ބަލައިފާސްކޮށް، ބަނގުރާކަމަށް ބެލެވޭ 500 އެމްއެލްގެ 1,677 ފުޅިއާއި، 5 ލީޓަރުގެ 23 ފުޅީގެ އިތުރުން މަސްތުވާތަކެތި ހުރި ދެ ރަބަރު ޕެކެޓު ވަނީ ހޯދާފައެވެ.
ގަވާއިދާ ހިލާފަށް ބަނގުރާ ގެންގުޅެ، އޭގެ ވިޔަފާރިކުރުމާއި ބޭނުންކުރުމުގެ ތުހުމަތުކުރެވޭ މި ދެ މީހުން، އިމިގްރޭޝަން ގާނޫނުގެ ދަށުން ފިޔަވަޅުއެޅުމަށްޓަކައި މިހާރު ވަނީ މޯލްޑިވްސް އިމިގްރޭޝަނާ ހަވާލުކޮށްފައެވެ. އަދި ފުލުހުން ދަނީ މި މައްސަލަ އިތުރަށް ތަހުގީގުކުރަމުންނެވެ.
