ރާއްޖޭގެ ވިޔަފާރިތަކާއި ބޭރުގެ އިންވެސްޓްމަންޓްތައް ހިމާޔަތްކުރުމަށްޓަކައި، ބައިނަލްއަގްވާމީ ފެންވަރުގެ ފަނޑިޔާރުން ހިމެނޭ ގޮތަށް "މާކެންޓައިލް ކޯޓު" (ވިޔަފާރި ޚާއްސަ ކޯޓު) ތަކެއް ގާއިމުކުރަންޖެހޭ ކަމަށް ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
އައްޑޫ ސިޓީ ފޭދޫގައި ބޭއްވި ޖަލްސާއެއްގައި އެމަނިކުފާނު ވިދާޅުވީ، ރާއްޖޭގެ މިހާރުގެ ޝަރުއީ ނިޒާމަށް އޮތް އިތުބާރު ކުޑަވެފައިވާތީ، ސިންގަޕޫރު ފަދަ ގައުމުތަކުގައި ޕްރެކްޓިސްކޮށްފައި ތިބި ގާބިލު ފަނޑިޔާރުން ގެނެސްގެން ބޮޑެތި ވިޔަފާރި މައްސަލަތައް ހައްލުކުރުމަކީ މުހިންމު ކަމެއް ކަމަށެވެ.
ރައީސް ޔާމީން ފާހަގަކުރެއްވި ގޮތުގައި، މިފަދަ ނިޒާމަކުން މައްސަލަތަކަށް 20 ވަރަކަށް ދުވަހުގެ ތެރޭގައި އަވަސް ނިޔާއެއް ލިބިގެންދާނެއެވެ. އަދި ބޭރުގެ ފަނޑިޔާރުންނަކީ ނުފޫޒު ނުފޯރުވޭނެ ބައެއްކަމާއި، އެތައް ބިލިއަން ޑޮލަރެއްގެ އިންވެސްޓްމަންޓް އެކުލެވޭ ޓޫރިޒަމް ސިނާއަތް ހިމާޔަތްކުރުމަށް އެފަދަ ފަނޑިޔާރުންނަށް މަހަކު 500,000 ޑޮލަރު މުސާރައިގެ ގޮތުގައި ދޭންޖެހުނު ނަމަވެސް އެއީ ރާއްޖެއަށް ތަހައްމަލު ކުރެވޭނެ އަދި ކުރަންޖެހޭ ހަރަދެއް ކަމަށްވެސް އެމަނިކުފާނު ވިދާޅުވިއެވެ.
