އިންޓަރ-ޕާލިމެންޓަރީ ޔުނިއަން (އައި.ޕީ.ޔޫ) ގެ 153 ވަނަ އެސެމްބްލީގައި ބައިވެރިވެވަޑައިގަތުމަށް ރައްޔިތުންގެ މަޖިލީހުގެ ރައީސް، އޮނަރަބަލް އަބްދުއްރަޙީމް އަބްދުالله ޓެންޒޭނިއާގެ އަރޫޝާއަށް ފުރާވަޑައިގެންފިއެވެ.
ދުނިޔޭގެ އެކި ޤައުމުތަކުގެ ޤާނޫނު ހަދާ މަޖިލިސްތަކުގެ ރައީސުންނާއި މަންދޫބުން ބައިވެރިވެވަޑައިގަންނަވާ މި މުހިންމު އެސެމްބްލީ ކުރިއަށްދާނީ މިމަހުގެ 5 ވަނަ ދުވަހުން ފެށިގެން 9 ވަނަ ދުވަހުގެ ނިޔަލަށެވެ.
މި ދަތުރުފުޅުގައި މަޖިލީހުގެ ރައީސްގެ އަރިހުގައި ޤާނޫނު ހަދާ މަޖިލީހުގެ ތަފާތު ދާއިރާތައް ތަމްސީލުކުރައްވާ އިއްޒަތްތެރި މެންބަރުންނާއި މަޖިލީހުގެ އިދާރީ އިސް ބޭފުޅުން ހިމެނޭ ގޮތަށް މަތީ ފެންވަރުގެ ވަފުދެއް ބައިވެރިވެވަޑައިގަންނަވައެވެ. އެގޮތުން ހުޅުދޫ ދާއިރާގެ މެންބަރު މުޙައްމަދު ޝާހިދު، ބާރަށު ދާއިރާގެ މެންބަރު އިބްރާހީމް ޝުޖާޢު، މާފަންނު މެދު ދާއިރާގެ މެންބަރު އަސްމާ ރަޝީދު، ހުރާ ދާއިރާގެ މެންބަރު ޑޮކްޓަރ އަނާރާ ނަޢީމް، ނިލަންދޫ ދާއިރާގެ މެންބަރު ފާޠިމަތު ސަޢުދާ، ގައްދޫ ދާއިރާގެ މެންބަރު މުޙައްމަދު ޢަލީ، އަދި ތޮއްޑޫ ދާއިރާގެ ޙުސައިން ސަމީރު މި ވަފުދުގައި ހިމެނިވަޑައިގަންނަވައެވެ.
މީގެ އިތުރުން މަޖިލީހުގެ ކައުންސެލް ޖެނެރަލް އަލްއުސްތާޛާ ފާތިމަތު ފިލްޒާ، ޗީފް އޮފް ބިއުރޯ އަޙްމަދު ނިހާން ޙުސައިން މަނިކު އަދި ފޮރިން ރިލޭޝަންސް ޑިޕާޓްމަންޓުގެ އެސިސްޓެންޓް ޑިރެކްޓަރ ޖެނެރަލް ޒުއްޔިނާ ބަދުރީ ވެސް މި ދަތުރުފުޅުގައި ބައިވެރިވެވަޑައިގަންނަވައެވެ.
މި އެސެމްބްލީގެ ތެރެއިން، ރައްޔިތުންގެ މަޖިލީހުގެ ރައީސް "އެންމެންގެ ޝާމިލުވުމާއި، އިތުބާރާއި، އަދި ފުރުޞަތުތައް ފަހިކޮށްދީގެން ހެޔޮވެރިކަން ކުރިއެރުވުމާއި މުޖުތަމައު ބާރުވެރިކުރުވުން" މި މުހިންމު މަޢުޟޫޢުގެ މައްޗަށް ބަހުސްކޮށް ވާހަކަފުޅުދެއްކެވުމަށް ހަމަޖެހިފައިވެއެވެ.
ބައިނަލްއަޤްވާމީ މިފަދަ ކަންކަމުގައި ރާއްޖެއިން ބައިވެރިވުމަކީ ޑިމޮކްރަސީގެ ހަމަތައް ހަރުދަނާކުރުމަށާއި، ބޭރު ޤައުމުތަކުގެ ޕާލަމެންޓްތަކާއެކު އޮންނަ ގުޅުން އިތުރަށް ބަދަހިކުރުމަށް ލިބިގެންދާ ރަނުގެ ފުރުޞަތެކެވެ.
