ޒުވާނުން ހުލްގުހެޔޮ، ޒިންމާދާރު ބަޔަކަށް ހެދުމަށް ސަރުކާރުން ކުރަމުންދާ މަސައްކަތްތަކުގެ ނަތީޖާ ރަނގަޅުކަމަށް ދިފާޢީ އަދި ވަޠަނީ ޚިދުމަތާ ބެހޭ ވަޒީރު ޙަސަން ރަޝީދު ވިދާޅުވެއްޖެއެވެ. ވަޒީރު މިހެން ވިދާޅުވީ ނޭޝަނަލް ސަރވިސް ސްކިލް ޓްރޭނިންގ 2 ވަނަ ބެޗްގެ ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.
ވަޒީރުގެ ވާހަކަފުޅުގައި ފާހަގަކުރެއްވި ގޮތުގައި، މިދިޔަ އަހަރުގެ އޮކްޓޫބަރު 1 ގައި ފެށި ވަޠަނީ ޚިދުމަތުގެ ޕްރޮގްރާމަށް އަހަރެއް ފުރިފައިވާއިރު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަނޑައެޅުއްވި ލަނޑުދަނޑިއަށްވުރެ އިތުރަށް ވަނީ ޙާޞިލުވެފައެވެ. އެގޮތުން އެއް އަހަރު ތެރޭގައި 1,000 ޒުވާނުން ތަމްރީނުކުރުމަށް އަމާޒުހިފި ނަމަވެސް، މިހާތަނަށް 1,028 ބައިވެރިން ތަމްރީނުކުރެވިފައިވާކަން އެމަނިކުފާނު ފާހަގަކުރެއްވިއެވެ.
މީގެއިތުރުން، ޒުވާނުން ނޭދެވޭ މަގުތަކުން ދިއުމަށް ބާރުއަޅާ ބަޔަކު އުޅުނު ނަމަވެސް، އެކަންކަމުން ސަލާމަތްކުރުމަށް ރައީސް ފެއްޓެވި މި ޕްރޮގްރާމަކީ ދިވެހިން ބަލައިގަނެފައިވާ މުހިންމު މަސައްކަތެއްކަމަށް ވަޒީރު ވިދާޅުވިއެވެ. އަދި ތަމްރީނު ފުރިހަމަކުރި ޒުވާނުން، ދަސްވި ކަންކަން ދިރިއުޅުމުގެ މާހައުލުގައި ބޭނުންކުރުމަށާއި، ކަންކަމާ ކެރިގެން ކުރިމަތިލައި ކެތްތެރިކަމާއެކު މަސައްކަތްކުރުމަށް ވަޒީރު ވަނީ ނަސޭހަތްތެރިވެވަޑައިގެންފައެވެ.
