މިއަހަރުގެ ސެޕްޓެމްބަރު މަހުގެ ނިޔަލަށް 37,038 މީހުން ގައިންގަޔަށް ނާރާ ބައްޔަށް ސްކްރީންކޮށްފައިވާކަމަށާއި އޭގެ ތެރޭގައި %18 މީހުންނަކީ ލޭ މައްޗަށް ދާ މީހުންކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.
މީގެއިތުރުން، ސްކްރީންކުރެވުނު މީހުންގެ %21.2 އަކީ ކޮލެސްޓްރޯލް މައްޗަށް ދާ މީހުންނާއި %10.4 އަކީ ހަކުރުބަލި ތަހައްމަލުކުރަމުންދާ މީހުން ކަމަށްވެސް އެޗްޕީއޭއިން ބުންޏެވެ.
ދުނިޔޭގެ ހިތުގެ ދުވަހާ ގުޅުވައިގެން އެޗްޕީއޭއިން ނެރުނު ރިޕޯޓުގައިވާ ގޮތުން، ރާއްޖޭގައި މަރުވާ މީހުންގެ %84 އަކީ ގައިންގަޔަށް ނާރާ ބަލިތައް ތަޙައްމަލު ކުރާ މީހުންނެވެ. މި އަހަރުގެ ހިތުގެ ދުވަހުގެ ޝިއާރަކީ "ޑޯންޓް މިސް އަ ބީޓް" އެވެ. ގައިންގަޔަށް ނާރާ ބަލިތަކާއި ހިތުގެ ބަލިތަކުން ރައްކާތެރިވުމަށްޓަކައި ޕްރައިމަރީ ހެލްތު ކެއަރ ނިޒާމު ހަރުދަނާކުރުމާއި، ދުންފަތުގެ އިސްތިއުމާލުކުރުން މަނާކުރުމަށް "ޖެނެރޭޝަނަލް ބޭން" ސިޔާސަތު ފަދަ މުހިންމު ފިޔަވަޅުތަކެއް ދައުލަތުން އަންނަނީ އަޅަމުންނެވެ.
