ވ. އާރަށް ކުއްޔަށް ދޫކުރުމުގެ މުއާމަލާތުގެ ތެރެއިން ކުރީގެ ރައީސް ޢަބްދުﷲ ޔާމީންގެ އެކައުންޓަށް ޖަމާވި އެއް މިލިއަން ޑޮލަރަކީ ޑޮލަރު މާރުކުރުމުގެ މުއާމަލާތަކުން ލިބުނު ފައިސާކަން ސާބިތުކުރަން އެމަނިކުފާނުގެ ފަރާތްޕުޅުން ހުށަހެޅުއްވި ދިފާއީ ހެކިތައް ޝަރީއަތަށް ބަލައިނުގަތުމަށް ދައުލަތުން ކްރިމިނަލް ކޯޓުގައި މިއަދު އެދިއްޖެއެވެ.
ދައުލަތުން ފާހަގަކުރީ ތަހުގީގު މަރުހަލާގައި ހަނުހުރުމުގެ ހައްގު ބޭނުންކުރެއްވުމަށްފަހު، އޭރު ހާމަނުކުރާ ހެކިންތަކެއް ޝަރީއަތަށް ބަލައިނުގަނެވޭނެ ކަމަށެވެ.
ދައުލަތުގެ ވާހަކަތަކަށް ރައްދު ދެއްވަމުން ރައީސް ޔާމީން ވިދާޅުވީ، ތަހުގީގުގައި ހަނު ހުންނެވީ ފުލުހުން ދެއްކި ބޭންކުގެ ލިޔުމަކީ ސައްހަ ލިޔުމެއް ކަމަށް ނުބެލެވޭތީ، އެކަމާ ގުޅޭގޮތުން ވާހަކަދައްކަވާނީ ޝަރީއަތުގައި ކަމަށް ނިންމެވުމުން ކަމަށެވެ. އަހަރެއްހާ ދުވަހުގެ މެދުކެނޑުމަކަށްފަހު މިއަދު އަލުން ފެށި މި ޝަރީއަތުގައި ޔާމީންގެ ދިފާއީ ހެކިންގެ ގޮތުގައި މަޖިލިސް މެންބަރުންނާއި ސިޔާސީ ބައެއް އިސް ބޭފުޅުންގެ އިތުރުން ޑޮލަރު މާރުކުރިކަމުގެ ލިޔުންތައް ހުށަހަޅުއްވާފައިވެއެވެ.
