ނަފުސާނީ ބައްޔަށް ޚާއްސަ 50 އެނދުގެ ހޮސްޕިޓަލެއް އިމާރާތްކޮށްދޭނެ ފަރާތެއް ހޯދުމަށް ފިނޭންސް މިނިސްޓްރީން މިއަދު ބީލަމަށް ހުޅުވާލައިފިއެވެ.
ހައުސިން މިނިސްޓްރީގެ އެދުމުގެ މަތިން ހުޅުވާލި މި ބީލަމުގައި ބައިވެރިވުމަށް 1,500 ރުފިޔާގެ ފީއެއް ދައްކަންޖެހޭއިރު، އަންނަ އޮކްޓޯބަރު މަހުގެ 20 ވަނަ ދުވަހުގެ ނިޔަލަށް ބަނޑޭރިޕޭ މެދުވެރިކޮށް އެ ފައިސާ ދެއްކޭނެއެވެ. ފިނޭންސް މިނިސްޓްރީން ބުނި ގޮތުގައި ބިޑް ސެކިއުރިޓީގެ ގޮތުގައި 864,000 ރުފިޔާ ހުށަހަޅަންޖެހޭއިރު، ބީލަން ހުށަހެޅުމުގެ ސުންގަޑިއަކީ އަންނަ މަހުގެ 25 ވަނަ ދުވަހުގެ މެންދުރުފަހު 1:00 އެވެ.
ސަރުކާރުގެ ސީދާ ބަޖެޓުން ޚަރަދުކޮށްގެން ނަފުސާނީ ބަލީގެ ހޮސްޕިޓަލެއް އިމާރާތްކުރަން ނިންމެވިކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހާމަކުރެއްވީ މިއަހަރުގެ އޭޕްރިލް މަހުއެވެ. ރައީސް ވިދާޅުވެފައިވަނީ، ފުރަތަމަ މި ހޮސްޕިޓަލް ގާއިމުކުރަން ނިންމީ ބޭރުގެ ލޯނު އެހީގައި ކަމަށްވީ ނަމަވެސް، ލޯނު ހަމަޖެހުމުގެ އިޖުރާއަތްތައް ދިގުލައިގެން ގޮސް މަޝްރޫޢު ލަސްވަމުންދާތީއާއި މިއީ އަވަސް ހައްލެއް ބޭނުންވާ މައްސަލައަކަށްވާތީ ސަރުކާރުގެ ބަޖެޓުން މި މަސައްކަތް ކުރިއަށްގެންދަން ނިންމެވީ ކަމަށެވެ.
މި ހޮސްޕިޓަލް އިމާރާތްކުރުމަށް މާލެ ސަރަހައްދުން 10,000 އަކަފޫޓުގެ ބިމެއް ކަނޑައަޅާފައިވާއިރު، މާލެ ސަރަހައްދުގައި މި ހޮސްޕިޓަލް ގާއިމުކުރަނީ ނަފުސާނީ ފަރުވާއަށް ބޭނުންވާ ގިނަ ވަސީލަތްތަކާއި ފަންނީ މީހުން މާލޭގައި ތިބުމުންނެވެ. ފާހަގަކޮށްލެވޭ ގޮތުގައި، މެންޓަލް ހެލްތު ހޮސްޕިޓަލް ފުރަތަމަ ގާއިމުކުރުމަށް ސަރުކާރުން ނިންމާފައި އޮތީ ލ. ގަމުގައެވެ.
