ނަހަމަ ގޮތުގައި ބިޒްނަސް ވިސާ ބޭނުންކޮށްގެން ރާއްޖެ އެތެރެވާ ބިދޭސީންނަށް "އެކްސްޕެޓް ސިސްޓަމް" މެދުވެރިކޮށް ވަރކް ޕަރމިޓަށް އެދި ހުށަނޭޅޭ ގޮތަށް އުސޫލު އިސްލާޙުކޮށްފިއެވެ.
ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވުޒާރާއިން ވިދާޅުވީ، މިއަދުން ފެށިގެން ބިޒްނަސް ވިސާ އަދި ސްޕެޝަލް ވިސާގައި ރާއްޖެ އެތެރެވާ ބިދޭސީންނަށް ރާއްޖޭގައި ތިބެގެން "ވަރކް ވިސާ" އަށް ބަދަލެއް ނުވެވޭނެ ކަމަށެވެ.
އެ ވުޒާރާއިން ފާހަގަކުރެއްވި ގޮތުގައި ބިޒްނަސް ވިސާއަކީ ވިޔަފާރީގެ ކުރު މުއްދަތުގެ ކަންކަމަށް ޕްރޮފެޝަނަލުންނަށް ދޫކުރާ ވިސާއެއް ނަމަވެސް، ބައެއް ވިޔަފާރިތަކުން ވަރކް ޕާމިޓް ހޯދުން އަވަސްކުރުމުގެ ނިޔަތުގައި ބިޒްނަސް ވިސާގައި މީހުން އެތެރެކުރުމަށްފަހު ވަރކް ވިސާއަށް ބަދަލުކުރެއެވެ. މީގެ އިތުރުން، ދޫކޮށްފައިވާ ހުއްދައިގެ ބޭރުން އެހެން ތަންތަނުގައި މަސައްކަތްކުރުމާއި "އޯޕަން ވިސާ" ގެ ނަމުގައި އަމިއްލައަށް އާމްދަނީ ހޯދަން ބިދޭސީން ވިޔަފާރިކުރާ މައްސަލަވެސް ވަނީ ފާހަގަކުރެވިފައެވެ.
ޤަވާއިދާ ޚިލާފަށް އުޅޭ ބިދޭސީންގެ މައްސަލަ ޙައްލުކުރުމަށް ކުރެވޭ މަސައްކަތުގެ ތެރެއިން މިހާތަނަށް 294,000 އަށްވުރެ ގިނަ ބިދޭސީންގެ ބަޔޯމެޓްރިކްސް ނަގާފައިވާއިރު، ސައްޙަ ވޯކް ޕާމިޓާއެކު ރާއްޖޭގައި މަސައްކަތްކުރާ ބިދޭސީންގެ އަދަދު ވަނީ 208,937 އަށް އަރާފައެވެ. އިމިގްރޭޝަނުން ވަނީ ބިދޭސީ މަސައްކަތްތެރިންނާއި، ވަޒީފާދޭ ފަރާތްތަކުން އަދި އާންމު ރައްޔިތުން މިކަމުގައި ޒިންމާދާރުކަމާއެކު އަމަލުކުރުމަށް އިލްތިމާސްކޮށްފައެވެ.
