ސްކޫލް ޗުއްޓީ ދުވަސްވަރާ ދިމާކޮށް ކުރިއަށް އޮތް ހަފުތާ ބަންދުގައި ކަނޑުތައް ގަދަވެ ވައިގަދަވާނެ ކަމަށް މޫސުމާ ބެހޭ ގައުމީ އިދާރާއިން ލަފާކޮށްފައިވާތީ، ކަނޑު ދަތުރުކުރާއިރު ލައިފް ޖެކެޓް އަޅައިގެން ދަތުރުކުރުމަށް އެމްއެންޑީއެފުން ވަނީ އިލްތިމާސްކޮށްފައެވެ.
އެމްއެންޑީއެފުން ވަނީ ދަތުރުކުރާ ފަރާތްތަކުން މޫސުމަށް ހާއްސަ ސަމާލުކަމެއް ދިނުމަށާއި، ކަމާބެހޭ ފަރާތްތަކަށް އެންގުމަށްފަހު ނޫނީ ދަތުރު ނުކުރުމަށް އެދިފައެވެ.
އޭގެއިތުރުން އުޅަނދުފަހަރުގައި ލައިފް ޖެކެޓާއި މުވާސަލާތީ ނިޒާމުގެ އިތުރުން ދިޔަހިއްކާ ޕަންޕު ފަދަ ވަސީލަތްތައް ރަނގަޅަށް ހުރިތޯ ޗެކްކުރުމަށާއި، މުދާ އުފުލާ އުޅަނދުފަހަރުން އެކަށީގެންވާ ވަރަށްވުރެ ބޮޑަށް މުދާ ބަރުނުކުރުމަށްވެސް ވަނީ އަންގާފައެވެ.
އަދި ޑައިވިންގ އާއި ވޯޓަރ ސްޕޯޓްސް އިންތިޒާމުކުރާ ފަރާތްތަކުން މޫސުމާ ބެހޭ އިދާރާއިން ރީނދޫ ނުވަތަ އޮރެންޖު ސަމާލު ނެރެފައިވަނިކޮށް ދަތުރު ނުކުރުމަށްވެސް އެމްއެންޑީއެފުން ވަނީ އިލްތިމާސްކޮށްފައެވެ.
