ހުޅުމާލެއިން ދުވަހު ކުއްޔަށާއި މަހު ކުއްޔަށް އެޕާޓްމަންޓް ކުއްޔަށްދޭ ކަމަށް ބުނެ ސޯޝަލް މީޑިއާގެ އެކި މަންސަތައް މެދުވެރިކޮށް މަކަރާއި ހީލަތުން ފައިސާ ހޯދަމުންދާތީ، އެކަމަށް އާންމުން ސަމާލުވުމަށް ދިވެހި ފުލުހުންގެ ޚިދުމަތުން އެދިއްޖެއެވެ.
ދިވެހި ފުލުހުންގެ ޚިދުމަތުން ޢާންމުކުރި މަޢުލޫމާތުގައި ފާހަގަކުރެއްވި ގޮތުގައި، ހުޅުމާލޭން އެޕާޓްމަންޓް ކުއްޔަށް ދޭ ކަމަށް ބުނެ އޮޅުވާލުމަށް ސޯޝަލް މީޑިއާގައި ފޭކް އެކައުންޓްތައް ހަދައިގެން ބައެއް ފަރާތްތަކުން އަންނަނީ ހަރަކާތްތެރިވަމުންނެވެ. އެގޮތުން "ހުޅުމާލޭ ޑެއިލީ ރެންޓް އެޕާޓްމެންޓް" ފަދަ ޓިކްޓޮކް އެކައުންޓުތަކާއި އެކި ފޯނު ނަންބަރުތައް ބޭނުންކޮށްގެން މިފަދަ އޮޅުވާލުންތައް ހިންގަމުންދާކަން ތަހުގީގަށް ވަނީ ފާހަގަކުރެވިފައެވެ.
މީގެ އިތުރުން، އެޕާޓްމަންޓް ކުއްޔަށް ހިފުމުގެ މުއާމަލާތްތައް ކުރުމުގެ ކުރިން އެ ތަނަކީ ހަގީގަތުގައި ވެސް ވުޖޫދުގައި ހުރި ތަނެއްތޯ އަދި މުއާމަލާތްކުރަނީ ސައްހަ ފަރާތަކާ ކަން ކަށަވަރުކުރުމަށް ފުލުހުން ވަނީ އިލްތިމާސްކުރައްވާފައެވެ. އަދި އެއްވެސް މީހަކަށް އެޑްވާންސް ފައިސާ ދެއްކުމުގެ ކުރިން ވެރިފަރާތުގެ ސައްހަކަން ބެލުމަކީ މުހިންމު ކަމެއްގެ ގޮތުގައި ފާހަގަކުރެއްވިއެވެ.
ސްކޭމްތަކުގެ ޝިކާރައަކަށް ވެއްޖެނަމަ ނުވަތަ އެފަދަ އެއްވެސް ޝައްކުކުރެވޭ ކަމެއް ފާހަގަކުރެވިއްޖެނަމަ، ލަސްނުކޮށް ފުލުހުންގެ ހޮޓްލައިން 3322111 އަށް ގުޅައި ނުވަތަ އެންޓި-ސްކޭމް ސެންޓަރަށް ރިޕޯޓުކުރުމަށް ފުލުހުން ވަނީ އިލްތިމާސްކުރައްވާފައެވެ. ރރ5ރ
