ރޭ ހިނގި އަލިފާނުގެ ހާދިސާގައި އަނިޔާވި އެކަކަށް އައިސީޔޫގައި ވެންޓިލޭޓަރުގެ އެހީގައި ފަރުވާދޭން ފަށައިފިއެވެ.
އަނިޔާވި މީހުންގެ ތެރޭގައި ހިމެނެނީ އިންޑިއާގެ ތިން މީހުންނާއި ސްރީލަންކާގެ މީހެކެވެ. މީގެ ތެރެއިން އެކަކުގެ ހާލު ވަރަށް ސީރިއަސްވެ، އައިސީޔޫގައި ވެންޓިލޭޓަރުގެ އެހީގައި ފަރުވާދެމުންދާއިރު، އަނެއް ތިން މީހުންނަށްވެސް ވަނީ އެކިވަރުގެ އަނިޔާތައް ލިބިފައެވެ. އަލިފާން ރޯވި އިމާރާތުގެ ފަސް ކޮޓަރިއެއްގައި ތިބި 15 ބިދޭސީން ވަނީ ރައްކާތެރިކަމާއެކު އެތަނުން ބަދަލުކުރެވިފައެވެ.
މި ހާދިސާގެ އަސަރު މއ. ދޫގަސްވިލާއާއި އެއާ އިންވެގެން ހުރި މއ. ދޫގަސް 1 ގައި ދިރިއުޅޭ ޖުމްލަ 41 މީހަކަށް ކޮށްފައިވާއިރު، އެ އެންމެންވެސް ވަނީ ވަގުތީގޮތުން އެތަންތަނުން ބަދަލުކުރެވިފައެވެ. އަދި އިންވެގެން ހުރި އިމާރާތުގެ ފެނުގެ ޚިދުމަތް މެދުކެނޑުމާ ގުޅިގެން، އެތަނުގައި ދިރިއުޅޭ 20 ދިވެހިންނާއި 6 ބިދޭސީންނަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ދަނީ އެހީތެރިކަން ފޯރުކޮށްދެމުންނެވެ.
ހާލުގައި ޖެހުނު ފަރާތްތަކަށް ބޭނުންވާ ޒަރޫރީ ބޯހިޔާވަހިކަމާއި އެހެނިހެން އެހީތެރިކަން ފޯރުކޮށްދިނުމުގެ މަސައްކަތް ކުރަމުންދާއިރު، ބިދޭސީންނަށް ބޭނުންވާ ކަންކަން ހަމަޖެއްސުމަށް އެ ފަރާތްތަކުގެ ސްޕޮންސަރުންނާ ގުޅުމުގެ މަސައްކަތްވެސް އެންޑީއެމްއޭއިން ދަނީ ކުރަމުންނެވެ.
