ކުރިއަށް އޮތް އަހަރަށް ރައްޔިތުންގެ މަޖިލީހުގެ އިދާރާ ހިންގުމަށްޓަކައި 227 މިލިޔަން ރުފިޔާގެ ބަޖެޓެއް ކަނޑައަޅައިފިއެވެ.
މި ބަޖެޓަކީ މަޖިލީހުގެ އިދާރީ ހިންގުމާއި، މެންބަރުންގެ މުސާރައާއި އިނާޔަތްތަކުގެ އިތުރުން މަޖިލީހުން ކުރިއަށް ގެންދާ އެކި މަސައްކަތްތަކަށް ބޭނުންވާ ޚަރަދުތައް ހިމަނައިގެން އެކުލަވައިލާފައިވާ ބަޖެޓެކެވެ.
މަޖިލީހުގެ ބަޖެޓުގެ ތަފްސީލުތައް ހާމަވެފައިވާއިރު، މީގެ ތެރޭގައި ގިނަ އަދަދެއްގެ ފައިސާ ޚަރަދު ކުރުމަށް ހަމަޖެހިފައިވަނީ އިދާރީ ހިންގުމަށާއި މުވައްޒަފުންނަށް ހިނގާ ޚަރަދުތަކަށެވެ. އަދި މަޖިލީހުގެ ކޮމިޓީތަކުގެ މަސައްކަތްތަކާއި ރާއްޖެއިން ބޭރުގެ ވަފުދުތަކާއެކު ބާއްވާ ބައްދަލުވުންތަކަށް ބޭނުންވާ ޚަރަދުތައް ވެސް މި ބަޖެޓުގެ ތެރޭގައި ވަނީ ހިމަނާފައެވެ.
ދައުލަތުގެ ބަޖެޓު އެކުލަވައިލުމުގެ މަސައްކަތް ފިނޭންސް މިނިސްޓްރީން ކުރަމުންދާއިރު، މިނިވަން މުއައްސަސާތަކާއި ދައުލަތުގެ ބާރުތަކުގެ ބަޖެޓުތައް ކަނޑައެޅުމުގައި ޚަރަދުތައް ކުޑަކުރުމަށް ސަރުކާރުން އިސްކަންދެއެވެ. އެގޮތުން ދައުލަތުގެ ޚަރަދުތައް ކުޑަކުރުމަށް އަޅަމުންދާ ފިޔަވަޅުތަކުގެ ތެރެއިން، މަޖިލީހުގެ ބަޖެޓު ވެސް އެކުލަވައިލާފައިވަނީ ވީހާވެސް ޚަރަދު ކުޑަވާނެ ގޮތްތަކަށް ބަލައިގެންނެވެ.
އަންނަ އަހަރަށް ލަފާކުރާ ދައުލަތުގެ ބަޖެޓު ރައްޔިތުންގެ މަޖިލީހަށް ހުށަހެޅުމުން، ބަޖެޓު ދިރާސާކުރާ ކޮމިޓީން މަޖިލީހުގެ ބަޖެޓާ ގުޅޭގޮތުން ފުޅާ ދާއިރާއެއްގައި މަޝްވަރާކޮށް ގޮތްތަކެއް ނިންމާނެއެވެ. މަޖިލީހުގެ އިދާރީ ހިންގުމަށް ބޭނުންވާ މި ބަޖެޓު ފާސްވެގެންދާނީ މުޅި ދައުލަތުގެ ބަޖެޓާއެކު މަޖިލީހުގެ ތަޅުމުން ފާސްކުރުމުންނެވެ.
