ނިޝާން ދިޔަމިގިލީ ޝަރަފުގެ އިއްޒަތް ކަށިމާ އަހުމަދު ޝާކިރަށް އަރުވައިފި

ދިވެހި ދައުލަތުން ދެއްވާ ޝަރަފުގެ އިއްޒަތްތަކުގެ ތެރެއިން ނިޝާން ދިޔަމިގިލީ ޝަރަފުގެ އިއްޒަތް، ދިވެހި ތާރީޚާއި އަދަބިއްޔާތަށް ގިނަގުނަ ޚިދުމަތްތަކެއް ކުރައްވާފައިވާ ކަށިމާ އަހުމަދު ޝާކިރަށް މިއަދު އަރުވައިފިއެވެ.

މި ޝަރަފު އޭނާއަށް އެރުވީ ރާއްޖޭގެ ތާރީޚަށާއި އަދަބިއްޔާތަށް ޚިދުމަތް ކުރުމުގެ ދާއިރާއިން ކޮށްދެއްވާފައިވާ އަގުހުރި މަސައްކަތްތަކުގެ އަގުވަޒަންކުރުމުގެ ގޮތުންނެވެ. ކަށިމާ އަހުމަދު ޝާކިރަކީ ދިވެހި ތާރީޚާއި އަދަބިއްޔާތުގެ ދާއިރާއިން ފާހަގަކޮށްލެވޭ ފަދަ ބޮޑެތި ޚިދުމަތްތަކެއް ދިގު މުއްދަތަކަށް ކުރައްވަމުން ގެންދަވާ ބޭފުޅެކެވެ.

އޭނާ ވަނީ ދިވެހި ތާރީޚާ ގުޅޭ ގިނަ އަދަދެއްގެ ފޮތްތައް އެކުލަވައިލައްވައި ޝާއިއުކުރައްވާފައެވެ. މީގެ އިތުރުން ވާހަކަދެއްކުންތެރިކަމާއި ތަމްސީލު ކުޅުމުގެ ރޮނގުންވެސް އޭނާ ވަނީ ގައުމީ ފެންވަރުގައި ފާހަގަކޮށްލެވޭ ފަދަ ކާމިޔާބީތަކެއް ހާސިލުކުރައްވާފައެވެ. ދިވެހި ދައުލަތުން ދެއްވާ އެންމެ މަތިވެރި ޝަރަފުތަކުގެ ތެރޭގައި ހިމެނޭ މި އިއްޒަތް ކަށިމާ އަހުމަދު ޝާކިރަށް އެރުވުމާ ގުޅިގެން، ގިނަ ބަޔަކު ދަނީ އޭނާއަށް ތަހުނިޔާ އާއި މުބާރަކުބާދީ ފޮނުވަމުންނެވެ. އޭނާ އަކީ މިހާރުވެސް ގައުމީ އިނާމާ ބެހޭ ކޮމިޓީގެ ޗެއާޕާސަންގެ މަގާމު ފުރުއްވަމުން ގެންދަވާ ބޭފުޅެކެވެ.