ގިނަ ބަޔަކު ކުރާ ސުވާލެކެވެ؛ "އަހަރެންގެ ހަށިގަނޑަށް ހިނގުން ރަނގަޅުކަން އެނގެއެވެ. ނަމަވެސް، ހަމައެކަނި ހިނގުމުން އަހަރެންގެ ކަސްރަތުގެ ބޭނުންތައް ފުދޭނެ ހެއްޔެވެ؟"
ބޭރަށް ނުކުމެ ބާރު ބާރަށް ހިނގާލުމަކީ ސިއްހަތަށް އާދަޔާޚިލާފު ފައިދާތަކެއް ކުރާ ކަމެކެވެ. ދިރާސާތަކުން ދައްކާގޮތުގައި ގަވާއިދުން ހިނގުމަކީ ލޭގެ ޕްރެޝަރު އެއްވަރެއްގައި ހިފެހެއްޓުމަށާއި، ނަފްސާނީ ދުޅަހެޔޮކަން އިތުރުކުރުމަށް އެހީތެރިވެދޭ ކަމެކެވެ. އަދި ހިތުގެ ބަލިތަކާއި، ހަނދާން ނެތޭ ބަލި ފަދަ ނުރައްކާތެރި ބަލިތަކުން ދުރުކޮށްދޭ ވަސީލަތެކެވެ. މީގެ އިތުރުން، މިއީ ވަކި ޚާއްސަ އިކުއިޕްމަންޓެއް ނެތި، އޮފީހަށް ދާ މަގުމަތީގައި ނުވަތަ ގޭގެ މަސައްކަތްތަކުގެ ތެރެއިންވެސް ފަސޭހައިން ކޮށްލެވޭނެ ކަމެކެވެ.
ނަމަވެސް، މި ހިސާބުން އުފެދޭ ސުވާލަކީ މިއީ "ކަސްރަތެއްގެ" ގޮތުގައި ފުދޭނެތޯއެވެ؟
"ހަރަކާތްތެރިވުން" އަދި "ކަސްރަތު": ތަފާތަކީ ކޮބާ؟
ނިއު ޔޯކް އިންސްޓިޓިއުޓް އޮފް ޓެކްނޮލޮޖީގެ އެކްސަސައިޒް ފިޒިއޮލޮޖިސްޓެއް ކަމަށްވާ އެލެކްސް ރޮތްސްޓީން ވިދާޅުވާ ގޮތުގައި، "ފިޒިކަލް އެކްޓިވިޓީ" (ހަށިގަނޑު ހަރަކާތްތެރިވުން) އަދި "އެކްސަސައިޒް" (ކަސްރަތު) ގެ މެދުގައި ބޮޑު ތަފާތެއްވެއެވެ.
ހިނގުމަކީ ހަށިގަނޑު ހަރަކާތްތެރިވުމުގެ ތެރޭގައި ހިމެނޭ، ސިއްހަތަށް ވަރަށް ފައިދާހުރި ކަމެކެވެ. ނަމަވެސް، "ކަސްރަތު" ކަމަށް ބެލެވެނީ ވަކި އުސޫލެއްގެ ދަށުން ރޭވިގެން، ހަށިގަނޑަށް ވަކި ވަރެއްގެ ބުރައެއް ދީގެން ކުރާ މަސައްކަތަށެވެ. ހިނގުން އެކަނި ކަސްރަތަކަށް ފުދޭނީ އެ ހިނގުމަކީ ހިތުގެ ވިންދު އަވަސްކޮށްލާ ފަދަ ބާރުމިނެއްގައި ކުރާ ކަމަކަށް ވާނަމައެވެ.
ހަމައެކަނި ހިނގުން ފުދޭނީ ކޮން ހާލަތެއްގައި؟
އާންމު ދިރިއުޅުމުގައި މާ ބޮޑު ހަރަކާތެއް ނެތި އުޅޭ މީހަކަށް، ދުވާލަކު 30 މިނެޓު ހިނގާލުމަކީވެސް ސިއްހަތަށް ލިބޭނެ ބޮޑު ކުރިއެރުމެކެވެ. ނަމަވެސް، ހަށިގަނޑުގެ ބާރު އިތުރުކުރުމަށާއި، މަސްތައް ވަރުގަދަކުރުމަށް ހަމައެކަނި ހިނގުމުން ނުފުދިދާނެއެވެ. ސިއްހީ މާހިރުން ލަފާދެނީ ހަށިގަނޑު އެންމެ ފުރިހަމަ ދުޅަހެޔޮކަމެއްގައި ބެހެއްޓުމަށްޓަކައި ހަފުތާއަކު މަދުވެގެން ދެ ދުވަހު މަސްތައް ވަރުގަދަކުރާނެ ކަސްރަތެއް ކުރުމަށެވެ.
ހިނގުން މިއަށްވުރެ ފައިދާހުރި ކަސްރަތަކަށް ހަދާނީ ކިހިނެއް؟
ހިނގުމުގެ ތެރެއިން ކަސްރަތުގެ ފުރިހަމަ ފައިދާ ހޯދަން ބޭނުންނަމަ ތިރީގައިވާ ކަންކަން ކުރެވިދާނެއެވެ:
-
ބާރުމިން އިތުރުކުރުން: ފަސޭހައިން ހިނގުމުގެ ބަދަލުގައި، ވާހަކަ ދައްކަން ކުޑަކޮށް އުނދަގޫވާ ވަރަށް ބާރަށް ހިނގުން.
-
އުސް ތަންތަނަށް ހިނގުން: ފަތަހަ ތަންތަނުގެ ބަދަލުގައި ކުޑަ އުސްމިނެއް ހުންނަ ސަރަހައްދުތަކުގައި ހިނގުމުން ހަށިގަނޑަށް ކުރާ ބާރު ބޮޑުވެ، މަސްތައް ވަރުގަދަވެއެވެ.
-
ބަރުދަން އުފުލުން: ހިނގާއިރު ކުޑަ ބަރުދަނެއް ނުވަތަ ހިފައިގެން ހިނގުން.
ނިންމާލަމުން ބުނެވޭނީ، ހިނގުމަކީ އެއްވެސް ކަސްރަތެއް ނުކޮށް ހުރުމަށްވުރެ އެތައް ގުނައެއް ރަނގަޅު ކަމެކެވެ. ނަމަވެސް، ހަށިގަނޑުގެ ދުޅަހެޔޮކަން އެންމެ މަތީ ދަރަޖައަށް ގެންދަން ބޭނުންނަމަ، ހިނގުމުގެ އިތުރުން މަސްތައް ވަރުގަދަކުރާނެ ކަސްރަތެއްވެސް ހިމަނާލުން މުހިންމެވެ.
