ޤާނޫނާ ހިލާފަށް ސިނގިރެޓް އުފައްދާ ކަމަށް ތުހުމަތުކުރެވުނު މައްސަލައަކާ ގުޅިގެން ފުލުހުންގެ ބެލުމުގެ ދަށަށް ގެންގޮސްފައިވާ ގިނަ އަދަދެއްގެ ސިނގިރެޓާއި ދުންފަތް އިއްޔެ ދޫނިދޫގައި ނައްތާލައިފިއެވެ.
އިއްޔެ ނައްތާލި ތަކެއްޗަކީ މާލޭގެ ހެންވޭރު ގޭގެ އެޕާޓްމަންޓެއްގައި ހިންގަމުންދިޔަ އޮފީހެއްގައި މެޝިން ބަހައްޓައިގެން ސިނގިރެޓް އުފައްދަނިކޮށް، މިދިޔަ އަހަރުގެ ޖެނުއަރީ 30 ގައި ހިންގި އޮޕަރޭޝަނެއްގައި އަތުލައިގަތް ތަކެއްޗެވެ.
ފުލުހުން ހާމަކުރި ގޮތުގައި ނައްތާލެވުނު ތަކެތީގެ ތެރޭގައި 4,285 ސިނގިރެޓް ކާޓޫނާއި، 232 ފޮށި ސިނގިރެޓްގެ އިތުރުން 93.60 ކިލޯގެ ދުންފަތް ހިމެނެއެވެ. މި ތަކެތި ނައްތާލާފައިވަނީ ފުލުހުންގެ ބެލުމުގެ ދަށަށް ގެންދެވޭ ތަކެތި ނައްތާލުމުގައި އަމަލުކުރާ އުސޫލުގެ ދަށުން، އެކަމަށްޓަކައި އެކުލަވައިލި ޚާއްސަ ކޮމިޓީގެ ބެލުމުގެ ދަށުންނެވެ.
