މަސްތުގެ ހާލަތުގައި ތިބެގެން ވެހިކަލްތައް ދުއްވާ މިންވަރު އާދާޔާޚިލާފަށް އިތުރުވަމުން އަންނާތީ، އެކަމަށް ވަރަށް ބޮޑަށް ސަމާލުކަން ދީގެން ފުލުހުން މަސައްކަތް ކުރަމުންދާކަން ހޯމް މިނިސްޓަރު އަލީ އިހުސާން "އަހާ" ފޯރަމްގައި ހާމަކުރައްވައިފިއެވެ.
މިނިސްޓަރު ވިދާޅުވީ، މަގުމަތީގެ ގަވައިދުތައް ނޭނގި، ފާސްނުވަނީސް ލައިސަންސް ނަގައިގެން ދުއްވުމާއި، އާބާދީ ބޮޑެތި ރަށްރަށުގައި އާދަޔާޚިލާފަށް ބާރަށް ދުއްވުމުގެ ސަބަބުން ނުރައްކާތެރި އެކްސިޑެންޓުތައް ހިނގައި މީހުންގެ ފުރާނަ ގެއްލެމުންދާ ކަމަށެވެ.
މި މައްސަލައަށް ހައްލެއް ހޯދުމަށްޓަކައި މާލެއާއި ބޮޑެތި ސިޓީތަކުގައި ޓްރެފިކް ފުލުހުންގެ ޚިދުމަތް ގާއިމުކުރުމަށް އެންމެ އިސްކަމެއް ދީގެން މަސައްކަތް ކުރަމުންދާކަން އިހުސާން ފާހަގަކުރެއްވިއެވެ. ފުލުހުންގެ ތަފާސްހިސާބުތަކުން ދައްކާ ގޮތުގައި މި އަހަރުގެ މިހާތަނަށް 2,100 އަށްވުރެ ގިނަ އެކްސިޑެންޓު ވަނީ ރިޕޯޓުކޮށްފައެވެ.
