ރާއްޖޭގެ ގައުމީ އެއާލައިން، މޯލްޑިވިއަނުން ލަގްޒަރީ ދަތުރުތަކަށް ޚާއްސަކޮށްގެން އަލަށް ގެނައި "ކިންގް އެއާ 360" މަރުކާގެ މަތިންދާބޯޓު މިއަދު ހަވީރު ރާއްޖެ ގެނެސްފިއެވެ.
މި ބޯޓަކީ "ނިލާ ކޮރަލްސް" އާ ގުޅިގެން މޯލްޑިވިއަނުން ފަށާ ލަގްޒަރީ އުދުހުންތަކަށް ގެނައި ބޯޓެކެވެ. ބޯޓު ރާއްޖެ އައުމާ ގުޅިގެން ވެލާނާ އިންޓަނޭޝަނަލް އެއާޕޯޓުގައި ބޭއްވި ހާއްސަ ރަސްމިއްޔާތެއްގައި އައިލެންޑް އޭވިއޭޝަން ސާވިސްގެ ޑެޕިއުޓީ މެނޭޖިން ޑިރެކްޓަރު އަލީ ސަލީމް ވިދާޅުވީ، ރާއްޖޭގެ ލަގްޒަރީ ރިސޯޓުތަކަށް ދަތުރުކުރުމުގައި މި ޕްރޮޑަކްޓް ވަރަށް މުހިންމު ދައުރެއް އަދާކުރާނެ ކަމަށެވެ.
އަލަށް ގެނައި ބޯޓުގެ މުހިންމު ތަފްސީލުތައް:
-
ޚާއްސަ ސިފަތައް: މަދު ފަސިންޖަރުންތަކަކާއެކު ދަތުރުކުރެވޭ، ހިތްގައިމު އިންޓީރިއާއެއް ހިމެނޭ އަދި އޭޓީއާރު (ATR) މަތިންދާބޯޓުތަކަށްވުރެ އަވަހަށް މަންޒިލްތަކަށް ދަތުރުކުރެވޭ ބޯޓެކެވެ.
-
ޚިދުމަތް ލިބޭނެ ފަރާތްތައް: ކުންފުނިތަކަށާއި، އަމިއްލަ ޖަމާއަތްތަކުގެ އިތުރުން ވަކިވަކި ފަރުދުންނަށްވެސް ޗާޓަރު ދަތުރުތަކަށް މި ބޯޓު ބޭނުންކުރުމުގެ ފުރުސަތު ވަނީ ހުޅުވާލާފައެވެ.
-
އޮންލައިން ބުކިންގ: ކުރިއަށް އޮތް 2-3 މަސްދުވަހުގެ ތެރޭގައި މޯލްޑިވިއަންގެ އޮންލައިން ޕްލެޓްފޯމް މެދުވެރިކޮށް ޓިކެޓް ނަގާއިރު މި ބޯޓުގެ ޚިދުމަތް ހިމެނޭހެން އެދުމުގެ ފުރުސަތު އާންމުކޮށް ހުޅުވާލާނެއެވެ.
މޯލްޑިވިއަނުން ހާމަކުރި ގޮތުގައި، ދުނިޔޭގެ މަތީ ފަންތީގެ ފަތުރުވެރިކަމުގެ މަންޒިލެއްގެ ގޮތުގައި ރާއްޖެ ދެމިއޮތުމަށް ކުރެވޭ މަސައްކަތްތަކަށް މި އައު ޚިދުމަތާއެކު އިތުރު ކުރިއެރުމެއް ލިބިގެންދާނެއެވެ.
